Është prezantuar në COD, libri Shqiponja dhe Oktapodi, me pjesëmarrjen e vetë autorit, Gianni Palagonia, përpara një publiku të gjerë me profesionistë nga fusha të ndryshme.
Ky është libri i tij i tretë, pas romaneve Heshtja dhe Në duart e Askujt, sjellë në shqip nga Shtëpia Botuese Dritan dhe përkthyesja Ajsela Koka. Të tre librat e autorit paraqesin në formën e romanit jetën e tij të vërtetë.
Shqiponja dhe Oktapodi është një libër kushtuar Shqipërisë, një ndërthurje simbolesh, që na jep që në titull lidhjen e fortë mes dy brigjeve të Adriatikut. Ngjarjet zhvillohen në vitet kur vetë Palagonia ka punuar në Shqipëri, për llogari të Interpolit. Rrugëtimi i autorit nga Italia e pasur në Shqipërinë e varfër e përball me plot surpriza e realitete tashmë të harruara në jetën e përditshme, që e kthejnë pas në Sicilinë e fëmijërisë së tij, por edhe me fenomene të zhdukura me kohë në botën perëndimore, siç është Kanuni.
Mes historive të bukura nga Shqipëria, mes pyetjeve kureshtare të të pranishmëve, autori ka mbajtur të mbërthyer vëmendjen e publikut për më shumë se dy orë.
Angazhimet e tij, veç të shkruarit, në bashkëpunim me Ambasadën Italiane dhe Shoqata Jofitimprurëse, përfshijnë edhe takimet me të rinjtë nëpër shkollat e Shqipërisë, për të folur rreth ligjit, drogës, korrupsionit, bullizmit, për të rrënjosur te brezat e rinj farën e ligjshmërisë, ndershmërisë, kulturës së kallëzimit.
Librat e Palagonias janë një etyd mbi vlerat morale, mbi vetësakrifikimin, deri edhe në idealizëm, të njerëzve që punojnë për të çrrënjosur një të keqe që ka hyrë deri në palcë të shoqërisë.
