Kreu i qeverisë Rama nuk ka rreshtur as sot së foluri mbi përplasjen e demokratëve dje, të cilën, në një lidhje të drejtëpërdrejtë nga kryeministria, ku iu përgjigj njē sërë komenteve të publikut, e cilësoi si nje betejë mesjetare.
Është një komunikim i veçantë tha Rama, ky i sotmi, me miqtë demokratë që ndodhen në këtë faqe. Ajo që ndodhi dje, nuk dëmton vetën PD-në por edhe ngrehinën institucionale të vendit, dhe patjetër që kjo është përgjegjësi e atyre personazheve, që janë pa asnjë vizion politik, pa asnje mesazh të fortë, përveç akuzave ndaj njëri-tjetrit, se kush nga ata është shërbëtori im. E vërteta është që këta të dy janë e njëjta mbetje, e ndarë përgjysmë. Arsyeja që unë kam vendosur të flas sot me demokratët, nuk janë këta të dy që në fakt janël i njëjti njeri, i ndarë në dy pasqyra. Për mua është momenti për urtësi. Ky nuk është vetëm një moment delikat vetëm për PD-në, si bosht i vetëm i opozitës për momentin, por edhe i ngrehinës së demokracisë në vend, dhe dje ajo shfaqje mesjetare me SHQUP-in e kthyer në një kështjellë, me një ushtri brenda e fortifikuar, me hekura, llamarina, teneqera e me një ushtri tjetër pajisur me çekiçë me trapano, me shkallë me vare, mund të kishte degjeneruar në gjakderdhje të rëndë, për demokratët e për demokracinë në vend. Dikush mund të thotë, ça pune kam unë, le të dëmtohen, po puna është që këtu dëmtohet i gjithë mjedisi social. Nuk jam këtu për tu thënë demokratëve më jepni votën, se zgjedhjet janë në 2025-n në mos gabohem, por jam për tu thënë që ne të gjithë këtu jemi shqiptarë. Në radhë të parë jemi njerëz. Nuk duhet ta harrojmë që jemi njerëz, nuk jemi bisha, Ne nuk jemi kafshë, nuk jemi majmunë. Ne nuk jemi barbarë, mesjetarë, tha mes të tjerave Rama në bisedën “live me demokratët”, i cili më pas publikoi një foto duke blerë domate, me mbishkrimin “Kur i thua gruas po kthehem nga puna, dhe gruaja të thotë mos më hajde pa domate”, me gjasa për të na rrëfyer, se përveç devotshmërisë ndaj mirëqenies së atdheut, nuk harron të jetë i devotshëm edhe për familjen.
