Është mjaft e lehtë ta thuash, e akoma më e lehtë ta bësh nëse ke vullnet e dëshirë, kur sheh fëmijët e parashkollorit (të shkollës “Ernest Koliqi” kësaj here) që i përqafojnë e i duan kaq shumë librat dhe vendet ku lexohet. Dhe kanë të drejtë në fakt, sepse sot festohet dita e librit të tyre, e librit për fëmijë, një fushë e kulturës shqiptare e cila ka ende shumë nevojë të promovohet e të mbështetet, për të mbërritur në nivelin e simotrave evropiane.
Dita e sotme nis herët në fakt, se emocioni e kënaqësia janë të pafundme, por po kaq herët ka nisur edhe përgatitja për këtë takim, i cili në kalendarin botëror të kulturës, shënon prej thuajse rreth pesëdhjetë vjetësh, Ditës Botërore të Librit për Fëmijë. Mësuese Albina e ka shënuar këtë datë qysh në tetor të 2021-it në ditarin e saj, duke u kujdesur ndërkaq që në mes të marsit 2022, për detajet që do të shijonin të vegjlit gjatë këtij takimi, për pjesët që do të përzgjidheshin për t’u lexuar e po ashtu edhe diskutimet mbi to dhe librat.
Albana Nexhipi Lekaj, përveçse përkthyese e shumë librave për fëmijë, është edhe mami i Kristinës, një prej vogëlusheve ardhur në këtë ditë me shokët e klasës, për të lexuar pranë “Qendrës së Librit për Fëmijë”, një vendi i ngrohtë ky mu në zemër të Tiranës, kuruar me aq dashuri dhe përkujdesje nga Anisa Ymeri, një prej gazetareve më të njohura të kulturës në vend, e po ashtu, prej thuajse dy vitesh, edhe themeluese e drejtuese e kësaj qendre, e cila është kthyer ndërkaq në një prej vendeve më të frekuentuara në qytet, sa u takon leximeve të librave, aktiviteteve ditore për fëmijë e mësimeve jashtë shkolle. Është e pamundur të mos e shquash pasionin e Anisës në fakt, teksa e sheh që përpiqet ta bëjë sa më të këndshëm ambientin për lexuesit vegjël, duke marrë stolat e ulëset prej sfungjeri, duke u kujdesur që ata të ulen, duke u ofruar librat për të lexuar, një kujdes që të lë pa fjalë, kur ndërgjegjësohesh për investimin shpirtëror bërë prej saj në këtë fushë.
Fëmijët ndërkaq janë entuziastë. Mosha e tyre 5-6 vjeçare, kureshtia dhe hareja me të cilën u qasen librave, ngjall shpresë, shpresë se një brez i mendjes po rritet.
Përkthyesja Albana Nexhipi Lekaj, ose mami i Kristinës siç e thërrasin fëmijët, ka zgjedhur për të vegjilit dy libra, botuar me një përkujdesje të pamatë nga shtëpia botuese “Dituria”, e cila, jo vetëm boton titujt më të mirë e bashkëkohorë të letërsisë evropiane e botërore për fëmijë, por në këtë ditë u kujdes të sillte pranë Qendrës për Fëmijë, edhe dy postera mes së cilëve edhe ai i projektit “Të ndryshëm por njësoj”, një projekt i ri ky i botimeve “Dituria”, që ka si synim kryesor “promovimin, nxitjen dhe mbështetjen e temës së diversitetit, përmes librit, te fëmijët dhe nxënësit e shkollave”.
I pari prej librave të përzgjedhur titullohet “Misteriozja”, shkruar nga shkrimtarja italiane me famë europiane Elisabetta Gnone (ardhur tashmë në shqip me dy seri, atë të “Fairy Oak” dhe atë të “Aventurave të Olga Papelit) , kurse tjetri “Si të bëhesh mbret” i shkrimtarit holandez Jan Terlouw, një personalitet shumë dimensional ky në lëm të botimeve letrare në Hollandë, me një mesazh të fuqishëm për fëmjtë e të rinjtë, të cilat kanë ambicje të bëhen dikush në jetë. E ndërsa “Misteriozja” u mëson fëmijëve se si të përballen me vështirësitë teksa rritej e si t’i kapërcejnë ato, “Si të bëhesh mbret” u dëshmon vlerën që ka vullneti dhe maturia, në ecjen përpara në jetë.
E teksa Dita Botërore e Librit për Fëmijë është caktuar qysh më 1967-n, për nder të datës së lindjes së shkrimtarit Hans Kristian Andersen, njohur botërisht për përrallat e veta si “Rosaku i shëmtuar që u bë mjelmë”, “Princesha dhe Bizelja”, “Rrobat e Mbretit” e shumë e shumë të tjera, duke u festuar që prej këtij viti në mbarë botën përmes leximeve për të vegjlit e me të vegjlit, në këtë takim pranë Qendrës së Librit nuk munguan përpos leximeve, as informacioni mbi këtë autor kaq të dashur që na ka rritur me përrallat e tij magjike, as bashkëbisedimet mes fëmijëve dhe nxënësve, drejtuar me aq mençuri dhe dashuri nga mësueset Albina dhe Adriana, e po ashtu as librat dhuratë, që mami i Kristinës, përkthyesja Albana Nexhipi Lekaj, me mbështetjen edhe të botimeve “Dituria”, u dhuruan fëmijëve.
Në këtë ditë të bukur për fëmijët, e cila është mirë të kthehet në një festë kombëtare, duke u propaganduar dhe promovuar gjerësisht edhe nga Ministria e Kulturës, MetropolPost.al dëshiron të bashkëndajë dy urime, një për fëmijët dhe një për prindërit: të parët u bëfshin dhe mbetshin dashnorë të librit, për një të ardhme sa më të sigurt e më të shndritshme, kurse të dytët, paçin durimin dhe fuqinë, që në këtë periudhë kur rrojmë në rrjetën e teknologjisë, t’u ushqejnë bijëve dashurinë për librin, duke fituar kështu, të paktën me brezat që po rriten, betejën e ashpër me klikun e internetit.
©MetropolPost.al
.
