Irina Shayk, lindur si Irina Valeryevna Shaykhlislamova, supermodele ruse, ish e dashura e futbollistit të famshëm Cristiano Ronaldos, mamaja e Leas, vajzës që e lindi me Bradley Cooper, festoi 40 vjetorin e lindjes më 6 janar. Në një intervistë të gjatë, ajo rrëfen mbi jetën e saj qysh në moshë të njomë dhe vështirësitë me të cilat është përballur.
Kujtimi i parë i fëmijërisë?
“Jam në kopësht dhe nuk flas me askënd. Nuk jam e shoqërueshme: ndoshta ngaqë u rrita në mes të asgjësë.”
Familja jote?
“Babai im punonte në minierë: në vitet 1980, qeveria të caktonte punë aty ku nevojitej. Ai u dërgua në një vend të shkretë: po ndërtonin një fshat rreth një miniere qymyri.
A patët një fëmijëri të shënuar nga varfëria?
“Pas vdekjes së babait, nëna nuk u martua kurrë: ajo ishte kërkuese në zgjedhjen e personit të duhur dhe nuk gjeti kurrë një “zëvendës” të përshtatshëm. Por fjala varfëri nuk na përshkruan: nëna ime ka mbajtur gjithnjë një qëndrim dinjitoz. Ne përveshëm mëngët. Unë dhe motra ime krijuam një kopsht me domate, patate, kastraveca… Sot mund të hap një fermë frutash dhe perimesh.”
Një Hirushe Ruse?
“Mund të pastroj plotësisht një shtëpi ose të lyej një mur: e mësova duke lyer një spital për 6 dollarë në orë. Më punësuan që të blija këpucë të reja. Si fëmijë, vishja vetëm rrobat e motrës sime Tatiana, dhe sa herë “trashëgoja” ndonjë nga rrobat e saj, ajo më vinte të pastroja shtëpinë për një javë. Për fat ishte e vogël: 24 metra katrorë për katër persona, një divan-krevat ku flinin prindërit e mi dhe një dhomë gjumi për mua dhe motrën time.”
Kur ndryshoi jeta juaj?
“Me vdekjen e babait tim. Isha 14 vjeçe dhe mbaj mend që mendova, ‘tani e tutje, jam unë burri i shtëpisë.’ Isha fëmija i dytë dhe prindërit e mi donin një djalë. Që nga ai moment, e lashë mënjanë anën time femërore.”
Si hytë në modë?
“Unë dhe motra ime u zhvendosëm në qytet: unë studioja marketing, ajo ndiqte shkollën e bukurisë. Fotot e mia të para u bënë rastësisht. Është për të qeshur: kur isha e vogël, as nuk kishim aparat fotografik në shtëpi; ato pak foto që kisha, ishin bërë në shkollë.”
“U nisa për në Paris pa ditur anglisht, pa para dhe pa rroba. Jetoja në një apartament me vajza të tjera ruse: agjencia na jepte 40 euro në javë për ushqim dhe metro. Po vdisnim urie. Dhe në atë kohë, bukuria ime nuk vlerësohej: me të kërkuarat ishin vajzat shumë të dobëta e bjonde. Unë, me buzët e mia të plota dhe gjoksin e madh, nuk bëja. Derisa erdhi fushata Intimissimi. I detyrohem shumë Italisë: pas asaj fushate erdhi Vogue ruse dhe Sports Illustrated.
Si ia dole mbanë?
“Falë Riccardo Tisci-t, i cili më donte për Givenchy. Ai pati guximin të guxonte me një modele të lirë: thanë se isha shumë seksi e se ndoshta kisha bërë operacion plastik. Nuk kisha para as për të ngrënë, e lëre më për të bërë retush…”
Fama jote u rrit gjithashtu falë marrëdhënies me Cristiano Ronaldon?
“Nuk jetoj me kujtimet e së kaluarës. Mendoj për të ardhmen.”
Një tjetër ish, po person i famshëm: Bradley Cooper, babai i vajzës tënde…
“Ai është një baba i shkëlqyer dhe ndan të njëjtat vlera me mua në rritjen e Leas. Është shumë e rrallë që prindërit e ndarë të jenë në të njëjtën gjatësi vale në rritjen e fëmijës. Lea nuk ka dado: unë dhe Bradley kujdesemi për të.”
Sa e ndryshme është fëmijëria e vajzës suaj nga e juaja?
“E pakrahasueshme. Megjithatë, Lea nuk ka as telefon dhe as kompjuter. Ajo rrallëherë lejohet të shikojë televizor: Unë vetë e mbroj veten nga përmbytja e lajmeve të këqija. Mundohem të ruaj një energji pozitive.”
Si e festove ditëlindjen e 40-të?
“Nuk jam vajzë festash. E bëj më shumë për miqtë e mi. Jam e turpshme dhe i urrej komplimentet. Dhurata më e mirë që mora ishte nga vajza ime: një kartolinë e shkruar në rusisht. Më preku thellë. Është e rëndësishme për mua që ajo t’i dijë rrënjët e saj.”
Çfarë bleve me fitimet e para në karrierë?
“Një apartament në Nju Jork. Nuk shkoj për pazar.”
Jeni ende beqare?
“Po, por duke pritur ndonjë surprizë nga Universi. Fatkeqësisht, burrat kanë frikë nga gratë e forta. Unë nuk jam lloji i gruas që e mban gojën mbyllur. Dhe kjo nuk vlerësohet.”
Sekreti i Irinës?
“Jam e fortë, por edhe e brishtë. Jam njeri. Ndonjëherë ndiej sikur nuk jam e mjaftueshme. Por pastaj ngrihem, rikthehem në këmbë. Për veten time dhe për vajzën time.”
Besoni?
“Po. Dhe mendoj se në jetën e mëparshme, kam qenë padyshim burrë.”
