Deklarat e fortë e Erdoganit: “Vetëm dy liderë i kanë mbetur botës tani, unë dhe Putini”

Presidenti turk Erdoğan ka deklaruar në një prej takimeve të veta, se tashmë botës i kanë mbetur vetëm dy liderë, e këta të dy janë ai dhe Putin.

Deklarata është bërë gjatë bisedës me studentët në Universitetin e Gazantepes, ku një pjesëmarrës, referuar kujtimeve të ish-kancelares gjermane Angela Merkel, “Liria: Kujtimet 1954–2021”, e pyeti për sekretin e suksesit të tij diplomatik.

,“Fjalët kanë rëndësi në diplomaci’ u përgjigj Erdogan, “por ruajtja e mekanizmave për dialog është edhe më e rëndësishme. Ne i quajmë këto strategji diplomatike dhe është thelbësore t’i mbështesim ato. Tani për tani mes liderëve të botës kemi mbetur vetëm dy prej nesh, unë dhe Vladimir Putin. Dhe kjo nuk është deklaratë personale, por është një fakt. Unë kam 22 vite në pushtet, po aq sa Putini. Kurse me kalimin e kohës, të tjerët janë eliminuar nga skena”, tha mes të tjerave Erdogani, i cili shprehu admirim për mandatin e Merkelit dhe u ankua për zbrazëtinë që la në lidershipin gjerman largimi i saj.

“Merkel kishte një vend të rëndësishëm në politikën gjermane. Pas largimit të saj, politika gjermane mori fund”, pohoi ai. Erdogan kujtoi me dashuri edhe marrëdhënien e tij me ish-kancelarin gjerman Gerhard Schröder, duke e përshkruar atë si një lider me një respekt të jashtëzakonshëm për Turqinë dhe traditat e saj.

“Schröder ishte ndryshe – me të vërtetë një lider i admirueshëm,” tha ai. “Edhe gjatë Ramazanit, kur na u bashkua në tavolinë, ai nuk pinte birrë për respekt. Ishte njeri me parime.”
Erdoğan u shpreh se marrëdhënia e tyre vazhdon edhe sot e kësaj dit. “Ai kishte një pozicion shumë të fortë në politikën gjermane. Dëshira ime është që në politikën turke, të shohim politikanë që ndajnë cilësitë e Schroder-it”, tha ai.

Më herët, Erdogan u shpreh pozitivisht edhe për synimet e presidentit të sapozgjedhur të SHBA-së, Donald Trump për t’i dhënë fund luftës në Ukrainë. Ai u shpreh se kjo mund të realizohej lehtësisht, nëse Trump niset me qëllimin për ta zgjidhur situatën.

Erdogan tha gjithashtu se se OKB-ja nuk është më një instrument efektiv i qeverisjes globale dhe se duhet të reformohet.