Janë marrë një sërë vendimesh ditën e sotme në mbledhjen e qeverisë, sa u takon marrëdhënieve Shqipëri-Kosovë.
Nga sa deklaruan ministri i Brendshëm Blendi Çuçi, dhe ministrja e Financave Delina Ibrahimaj, dy prej vendimeve të rëndësishme kanë qenë ato për nënshkrimin e marrëveshjeve mbi lejet e qendrimit të qytetarëve të dy vendeve, e po ashtu, edhe sa u takon njohjes së kontributeve të tyre, në vendet respektive.
Sot miratuam një nga marrëveshjet që do të nënshkruajmë ditën e premte në mbledhjen e përbashkët mes qeverive të shqipërisë e kosovës, u shpreh ministri i Brendshëm Çuçi, marrëveshje që ka të bëjë me lejet e qendrimit të shtetasve respektivë. Është një lajm i mirë për shtetasit e Kosovës që tani do ta marrin me një aplikim dhe pa dokumenta, menjëherë, lejen e qendrimit për 5 vite në Shqipëri, dhe brenda lejes së qëndrimit do të jetë edhe leja e punës, dhe është po ashtu edhe lajm i mirë për shqiptarët, që do të marrin lejet e qendrimit në Kosovë me procedura shumë më të lehtësuara se ç’janë sot.
Ndërkohë që Ministrja e Financave, Delina Ibrahimaj, deklaroi se ‘edhe Ministria e Financave dhe e Ekonomisë, ka prezantuar një marrëveshje e cila ka të bëjë me mbrojtjen sociale të qytetrëve shqiptarë, dhe konkretisht është marrëveshja për njohjen e sigurimeve shoqërore, nëpërmjet republikës së Shqipërisë dhe republikës së Kosovës. Marrëveshja, theksoi ministrja, është shumë e rëndësishme, për të siguruar një trajtim të barabartë të të gjithë të punësuarëve, punëmarrësve, të cilëve do t’u njihen periudhat e sigurimeve në të dyja vendet.
