Garës për kryetar partie në Partinë Demokratike, i është shtuar sot edhe emri i deputetit demokrat Agron Shehaj, i cili, jo më larg se sot në mesditë, ka shpallur kandidaturën e tij për të qenë pjesë e garës për kryetar të PD-së.
Ne demokratët do ta kapërcejmë gjendjen e vështirë ku jemi dhe do ngrihemi më të fortë se më pare, shkruan Shehaj në njoftimn e tij. Përballë autokracisë, korrupsionit dhe paaftësisë së qeverisë, ne do të ndërtojmë alternativën e lirisë, ndershmërisë dhe aftësisë. Për këtë duhen energji të reja, vizion i ri, drejtim i ri. Me ketë bindje, kam vendosur të kandidoj për kryetar të Partisë sime. Konkurimin nuk e shoh si garë për një post, por si një përpjekje të përbashkët me të gjithë demokratët që dëshirojnë që partia jonë të jetë partia e anëtarëve: një parti e vërtetë demokratike, moderne dhe e hapur.
Deri më tani, në garë për të kryetarë të Partisë Demokratike janë gjithësej pesë emra, përfshirë edhe kreun aktual të sajin, Lulëzim Bashën.
Në njoftimin e kanditaturës së vet, Edith Harxhi, një tjetër emër në garë për kreun e PD-së, njofton se projekti i saj synon kthimin e Partisë Demokratike jo vetëm tek anëtarët, por edhe tek qytetarët, të cilëve, sipas Harxhit, meritojnë t’u kthehet kthehet shpresa përmes një ringritjeje të së djathtës.
Sot, pas 30 vitesh, kur secili prej nesh bën bilancin jetësor, shkruan Harxhi në statusin e saj, mendova se ka ardhur koha për të përfaqësuar dhe mundësuar një projekt të ri për Partinë Demokratike. Projekt ky, i bazuar në vlerat e vërteta më të mira të së djathtës bashkëkohore, si liria, njeriu, prona, familja, besimi, tregu dhe sipërmarrja e lirë, autonomia vendore, meritokracia, barazia para ligjit, çështja kombëtare dhe Euro-Atlantizmi Ky projekt synon kthimin e Partisë Demokratike jo vetëm tek antarët dhe mbështetësit e saj, por tek qytetarët, tek shqiptarët. Ata të cilët për shumë vite ëndërruan një vend ndryshe nga ky që kemi sot. Ata që ky tranzicion lodhës, i mbarsur dhe i kapluar nga interesa përfitimesh vetjake dhe llogaritje të vogla meskine të disa politikanëve të papërgegjshëm e të pangopur, i bëri të humbasin shpresën dhe besimin. Jam e bindur se kjo shpresë dhe ky besim mund dhe duhet t’ju rikthehet shqiptarëve. Është pikërisht ky kumt shprese të cilin dua t’ju përcjell sot shqiptarëve. Jam e vetëdijshme se vetëm një ringritje e të djathtës shqiptare mbi baza morale, vetëm bashkimi i çdo kontributi, vetëm rihapja e zgjerimi i Partisë Demokratike, mund të rikthejë shpresën dhe besimin e humbur. Asgjë nuk është e pamundur!
E teksa Fatbardh Kadilli vë lë lojë pastërtinë personale dhe politike, integritetin politik, si dhe këmënguljen për të mos lënë asnjë kauzë në mes sikurse, siç pretendon Kadilli ka bërë Basha, Ibsen Elezi, një emër surprizë në këtë garë për shumë shqiptarë, pjesë e lëvizjes “Për PD”-në, synon shkëputjen e përfundimtare të PD-së nga “mentaliteti marksist dhe neokomunist” që sipas tij po instalohet aty. Në një nga intervistat e tij, Ibsen rrëfen se në 2018, Basha dhe njerëzit që ai mban përreth as nuk e kishin lënë të garonte për të qenë pjesë e Këshillit të PD-së, çka ai e cilësoi tejet absurde në një parti si Demokratikja, ku më e pakta demokracia e brendshme, do të duhej të funksiononte me se s’bën.
Në parashtrimin e kandidaturave së bashku me zonjën Harxhi, të dy pjesë e grupimit për PD-në, Elezi kërkon nga kryesia e PDSH-së pasjen e një gare të ndershme e të lirë, pavarësisht nga koha e shkurtër në dispozicion.
Të nderuar zonja dhe zotërinj, shkruan ai në kërkesën drejtuar kryesisë së Partisë Demokratike, bazuar në vendimin e Kryesisë së Partisë Demokratike të Shqipërisë për shpalljen e garës për Kryetar të PDSH që do të mbahen në datë 13 qershor 2021, po ju bëjmë me dije se nga Grupi për PD do paraqiten dy kandidatura, zonja Edit Harxhi dhe zoti Ibsen Elezi, shkruan ai në këtë kërkesë. Për këtë po ju parashtrojmë disa kërkesa të domosdoshme për garantimin e një gare të ndershme dhe të lirë, pavaresisht nga koha tejet e shkurtër e vendosur në mënyrë të njëanshme nga kryesia e PDSH. 1) Kryesia e PDSH-së dhe Komisioni Elektoral të vënë në dispozicion të kandidatëve për Kryetarë të PDSH-së, jo më vonë se data 24 maj 2021, listën e plotë të anëtarësisë së PDSH-së. 2) Të rishikohet përberja e Komisionit Zgjedhor dhe atyre në nivel dege, duke përfshirë përfaqësues të kandidatëve për Kryetar. 3) Të hartohet një axhendë e takimeve të përbashkëta të kandidatëve me anëtarësinë, për të shpalosur platformat politike dhe zhvillimin e debatit. 4) Zyra e Organizimit dhe kryesitë e degëve të venë në funksion të kandidatëve për Kryetar të PDSH-së, infrastrukturën dhe burimet administrative për zhvillimin e takimeve të përbashkta të sipërcituara.
Deri më tani nuk dihet ende në do të ketë kandidatura të tjera në vijim, në garë me Lulëzim Bashën për të qenë krerë të PD-së. Ajo që dihet është se Lulëzim Basha, kreu aktual të PD-së, të cilit në fakt iu kërkuar dorëheqja nga shumë demokratë pas humbjes së zgjedhjeve të 25 prillit, vazhdon të mblidhet ende me bashkëpunëtorët e partisë në rrethe, duke thënë se do ta vazhdojnë deri në fund betejen për rrëzimin e regjimit Rama-Doshi-Rakpi, një treshe kjo, e përfolur gjerësisht prej tij dhe demokratëve të tjerë, si dora që ka manipuluar rezultatin e zgjedhjeve të 25 prillit.
