Kreu i shtetit Ilir Meta ka bërë me dije përmes fejsbukut të tij, se ka takuar kreun e OBSH-së Adhanom, i cili e ka njohur me konkluzionet më thelbësore të Samitit të G20-s, e të cilit i ka treguar pasojat e rënda të pandemisë së covid-19 në Shqipëri, duke i kërkuar mbështetje më të madhe në mbrojtje të shëndetit të shqiptarëve.
Një takim i ngrohtë në Romë me Drejtorin e Përgjithshëm të Organizatës Botërore të Shëndetësisë, Dr. Tedros Adhanom Ghebreyesus, shkruan Meta. Më njohu me konkluzionet thelbësore të Samitit të G20, që në fokus kryesor kishte pandeminë globale COVID-19 dhe rimëkëmbjen ekonomike.
E informova lidhur me pasojat e rënda të pandemisë në vendin tonë, veçanërisht për shëndetin dhe jetët e qytetarëve, për ndikimet thellësisht negative në ekonominë shqiptare, si dhe për hapat, që po ndiqen, për tejkalimin sa më parë të pasojave.
Shpreha interesin për një vëmendje më të madhe dhe mbështetje konkrete për Shqipërinë nga OBSH, kryesisht për sistemin tonë shëndetësor, për të bërë gjithçka duhet për mbrojtjen efikase të jetës dhe shëndetit të qytetarëve shqiptarë.
