Sipas një raporti të publikuar prej Institutit të Statistikave mbi papunësinë dhe punësimin gjatë 2021-it, rezulton se gjatë 2 tremujorëve të parë ka pasur një ulje të papunësisë krahasuar me vitin e shkuar, dhe një rritje të punësimeve, kryesisht në sektorët e industrisë dhe shërbimeve.
Në tremujorin e dytë 2021, thuhet në këtë raport, shkalla e punësimit për popullsinë 15-64 vjeç është 60,7 %. Gjatë këtij tremujori, numri i të punësuarve u rrit me 1,0 %, krahasuar me tremujorin e dytë të vitit 2020, dhe me 2,9 %, krahasuar me tremujorin e parë 2021. Në tremujorin e dytë 2021, shkalla zyrtare e papunësisë në Shqipëri, për popullsinë 15 vjeç e lart është 11,6 %. Niveli i papunësisë u ul me 2,5 %, krahasuar me të njëjtin tremujor të vitit 2020 dhe me 1,9 %, krahasuar me tremujorin e mëparshëm.
Sipas këtij raporti punësimi ka njohur rritje në sektorët e industrisë dhe shërbimeve, dhe ka pësuar një rënie të ndjeshme në sektorin e bujqësisë.
Në terma vjetorë, punësimi rritet me 10,8 % në sektorin e industrisë, thekson raporti me 3,1 % në sektorin e shërbimeve, ndërsa ulet me 6,6 % në sektorin e bujqësisë. Krahasuar me tremujorin e mëparshëm, në tremujorin e dytë 2021, punësimi për popullsinë 15 vjeç e lart u rrit me 1,1 %. Punësimi u rrit me 2,4 % në sektorin e industrisë, me 1,1 % në sektorin e shërbimeve, dhe 0,2 % në sektorin e bujqësisë.
Të papunët e dekurajuar zënë një vend të rëndësishëm në këtë raport, të cilët, sipas raportit të INSTAT për dy tremujorët e parë të 2021, kapin 14,1 % të popullësisë jo aktive ekonomikisht.
Gjatë tremujorit të dytë të vitit 2021, thotë raporti, 18,1 % e popullsisë ekonomikisht jo-aktive dhe në moshë pune (15-64 vjeç) ishin duke përmbushur detyrat shtëpiake, 11,5 % ishte në pension ose pension të parakohshëm, ndërsa 10,7 % në paaftësi të përhershme. Gjatë tremujorit të dytë 2021, 11,6 % e popullsisë ekonomikisht jo-aktive (në grup-moshën 15-64 vjeç), deklaruan se nuk po kërkonin punë, pasi besonin se nuk ka punë të disponueshme, pra klasifikohen si të papunë të dekurajuar. Në popullsinë e moshës 30-64 vjeç ky grup përbën 14,1 % të popullsisë ekonomikisht jo-aktive të kësaj grup-moshe, sqaron mes të tjerave raporti.
Ndërkaq, thuhet në raportin e INSTAT, “Shkalla zyrtare e papunësisë për të rinjtë 15-29 vjeç është 19,9 %. Krahasuar me tremujorin e dytë të vitit 2020, shkalla e papunësisë për të rinjtë, në tremujorin e dytë 2021, është ulur me 1,5 pikë përqindje. Krahasuar me tremujorin e parë 2021, ky tregues është ulur me 3,4 pikë përqindje. Shkalla e papunësisë për grup-moshën 30-64 vjeç është 9,5 %. Ne terma vjetorë ky tregues nuk ka ndryshuar por është rritur me 0,4 pikë përqindje, krahasuar me tremujorin e mëparshëm.”
