Kanë reaguar pas deklaratës së Bashës mbi përjashtimin e Berishës nga grupi parlamentar, edhe disa nga figurat më kryesore të kësaj partie, si Jozefina Topalli dhe Bujar Nishani.
Në statuset e tyre ata e cilësojnë Bashën kryesisht si njeri skuth, pa kontribute në Partinë Demokratike, që ka minuar demokracinë brenda PD-së, që fyen e dhunon cdo institucion brenda PD-së, që ka kohë që e ka shitur PD-në dhe Sali Berishën, por se vetëm pardje e bëri publike.
Statusi i plotë i Jozefina Topallit, ish nr 2 i PD-së, ish kryetare e Parlamentit Shqiptar
Nxirreni nga zyra. Sonte më kujtoi edhe një hërë Enver Hoxhën! Demokratë përjashtoni Lulzim Bashën nga Partia Demonratike! Lulzim Basha ka vite që punon kundra interesit kombëtar dhe në veçanti kundra Partisë Demokratike. Sjellja e tij nuk ka patur kurrë lidhje me parimet e vlerat e kësaj force politike. Çdo ditë, që nga dita e parë që ka zbritur në Tiranë, ai ka patur vetëm një qëllim: pasurimin e tij dhe të familjes se tij, përmes karriges politike. Nëse ka një person që ka minuar demokracinë brenda Partisë Demokratike e me tej, ai e ka emrin Lulzim Basha. Që nga dita që u vendos kryetar, ai nuk pranon mendime ndryshe, nuk respekton statutin e partisë, nuk bën zgjedhje, nuk njeh vote dhe nuk i intereson as interesi i demokratëve dhe as i Interesi i vendit. Praktikisht, ai është i deligjitimuar në atë parti. Ai ka shitur interesat e popullit opozitar dhe si të tillëe ata të vendit.
Ai ka dëmtuar interesin publik të shqiptarëve në çdo pozicion ku ka qenë. Pa larguar Lulzim Bashën nuk ik Edi Rama. U bënë kaq vite që ia them demokratëve. Po e përsëris edhe sot. Nëse ka një njeri të korruptuar edhe në opozitë, ai e ka emrin Lulzim Basha. Nëse ka një njeri që ka kontribuar për minimin e demokracisë ai e ka përsëri emrin Lulzim Basha. Aftësia e tij me e madhe është shitja e çdo bashkëpunëtori të tij. Këtë e ka dëshmuar në vite. Kur pastaj je dhe vulnerabël për shkak të korrupsionit dhe pasurive të paligjshme, natyrisht që shkon dhe përtej. Sonte tha :- Kam vendosur të përjashtoj Sali Berishën. Prap e konsideron vehten mbi ligjin. Ai nuk ka asnjë të drejtë ligjore e statuore ta bëjë këtë. Sonte më kujtoi edhe një herë Enver Hoxhën.
Statusi i Bujar Nishanit, ish anëtar Kryesie i PD-së, ish Presidenti i vendit
Lulzim Basha ka vepruar si një skuth !Një njeri i katapultuar në krye të Partisë Demokratike, pa asnjë kontribut politik e partiak, pa asnjë sakrificë dhe eksperiencë në beteja politike, një përfitues i përhershëm pa kurrfarë meritash, vendos të përçajë në mënyrë fatale atë parti. Lulzim Basha fyen, përçmon e injoron çdo institucion e rregull minimal në Partinë Demokratike, duke marrë një vendim ekstrem, të përjashtimit nga Partia Demokratike të themeluesit të saj pa asnjë diskutim në forumet e partisë, pa asnjë mbështetje në statutin dhe rregullat legale të partisë, pa asnjë procedurë vendimarrëse të Kryesisë, Këshillit Kombëtar apo Kuvendit të Partisë Demokratike! Vendimet personale, në fshehtësi, në mungesë të diskutimit midis të zgjedhurve legjitim të demokratëve, jashtë forumeve të partisë, janë karakteristika të një skuthi politik. Ky akt është dhunim i rëndë i parimeve më fondamentale të lirisë, drejtësisë dhe demokracisë! Ky është Lulzim Basha që u katapultua politikisht me misionin e asgjesimit të Partisë Demokratike, asgjesimin e së djathtës në politikën shqiptare, asgjesimin e alternativës qeverisëse përballë së majtës, trashegimtare e stalinistëve shqiptarë filoserbe. Ky është sot pengu dhe argati i Edi Ramës, në krye të Partisë Demokratike! Demokratët, shqiptarët e ndershëm, njerëzit e lirë dhe patriotë duhet të mos dorëzohen përballë këtij provokimi të rëndë për asgjesimin e fondamenteve me bazike të demokracisë. Cilido që beson tek vlerat, parimet dhe morali, duhet të luftojë çdo ditë për ringritjen e Partisë Demokratike, për rivendosjen e parimeve dhe garancive bazë të lirisë, të së drejtës dhe demokracisë në këtë vend. Kushdo që hesht sot është bashkëfajtor në asgjesimin e asaj partie dhe vlerave të demokracisë në tërësi!
