Të paktën 10 persona kanë vdekur në një aksident rrugor në Kroacinë Lindore, ku një autobus me targa kosovare, që udhëtonte nga Frankfurti për në Prishtinë e Kosovë, ka dalë nga rruga për arsye ende të paqarta.
Sipas autoriteteve lokale, 45 të aksidentuar janë shpënë në një spital të Slavonski Brod, rreth 170 kilometra në jug-perëndim të Zagrebit dhe me gjasa, pasagjerët në bord kanë qenë kosovarë që ktheheshin nga Evropa drejt shtëpive të tyre në Kosovë.
Aksidenti ka ndodhur rreth orës 6 të mëngjesit në autorstradën mes Zagrebit dhe kufirit serb. Sipas shefit të policisë lokale Franjo Galic, i cili e cilësoi aksidentin si një nga më të këqinjtë që kishte parë, autobusi ishte plot dhe në të udhëtonin rreth 60 persona.
Kryeministri kroat ka shprehur ngushëllimet për familjarët e të ndjerëve e po ashtu edhe për popullin Kosovar, “Shpresojmë që të plagosurit ta marrin sa më parë veten”, ka shkruar Plenkovic në tuiterin e tij.
Autostrada ku ka ndodhur aksidenti, është një nga arteriet më të rëndësishme rrugore që përshkon Kroacinë, tejet e ngarkuar aktualisht me trafik, për hir të turizmit dhe punëtorëve të huaj që kthehen në shtëpi nga Evropa Perëndimore.
