Vrasja me armë zjarri në sallën e gjyqit të gjyqtarit Kalaja në Gjykatën e Apelit, ka ngjallur reagimin e shume prej kolegëve e bashkëpunëtorëve të tij.
Një prej reagimeve ka ardhur edhe prej avokates Blertë Kraja, e cila merret edhe me çështjet e pronave.
Në statusin e saj Kraja thekson se avokatët kanë mbi tetë vjet që kane vënë alarmin për agoninë e gjyqësorit, ku zvarriten me mijëra çështje, duke bërë apel për ndryshimin e Kushtetutës, në mënyrë që sallat të mbushen me gjyqtarë që u japin gjërave drejtimin e duhur.
“Arma, që u shkrep dje në një sallë gjyqi na ka vrarë të gjithëve ne që punojmë ne ato institucione,” shkruan Kraja në statusin e saj, ” ca si punonjës shteti, po aq dhe ne të sektorit privat, që rropatemi ta bindim Gjykatën në drejtësinë e pretendimeve të klienteve tanë. Ne avokatët kemi 8 vite që kemi vënë alarmin se gjyqësori është në agoni, se Gjykatat duhet urgjentisht të mbushen me gjyqtarë dhe njerëzit të marrin zgjidhje të shpejtë e me cilësi nga gjyqësori. Politika bën se nuk sheh, ekzekutivi kënaqet, ku me e marrë me qeverisë në një vend pa Gjykata. Tashti çështja është në tavolinën e Kuvendit. Ndryshoni Kushtetutën që Gjykatat (shkallë e parë dhe apeli) të mbushen me gjyqtarë, se Gjykatën e Lartë dhe Kushtetuese e keni mbushur me jo magjistratë. Riktheni Gjykatat pranë qyteteve. Centralizmi absurd që keni krijuar ushqen korrupsionin politik të Tiranës, zvarrit gjyqet, shton kostot për qytetarët dhe pasojën po e hame të gjithë ne që takohemi për punë në Gjykatë. Ah, dhe jo më pak e rëndësishme, me bllokimin e çështjeve nga 10 vite në Gjykata, keni ndalur ritmin e ekonomisë së ligjshme ne vend.
Qofsh i paharruar Gjykatës Astrit Kalaja. Do të kujtoj gjithmonë për mirësinë, pozitivitetin dhe gazmendin në çdo mjedis.Ti ishte thjesht kurbani i rradhës në Gjykatat e mbushura me njerëz të dërrmuar nga pritja e gjatë për drejtësi. Amin”
