Biznesi dhe mbështetësit politikë të presidentit amerikan Trump, janë tejet të shqetësuar për strategjinë tregtare që rrezikon të dëmtojë ekonominë amerikane. Vetëm tri muaj pasi presidenti mori detyrën, disa nga mbështetësit më të shquar ekonomikë të Donald Trump, kanë filluar të distancohen nga politika e tij mbi tarifat doganore. Figura të shquara si Elon Musk, Bill Ackman dhe madje disa senatorë republikanë, kanë nisur të shprehin publikisht mospajtimin e tyre me të, nga frika mos strategjia tregtare e administratës, mund të çojë në një recesion ekonomik.
Së fundmi, ka qenë Elon Musk ai që ndau një video ku Milton Friedman, një ikonë e ekonomisë së tregut të lirë, përdorte shembullin e zinxhirit të furnizimit të lapsit, për të demonstruar joefektivitetin e tarifave doganore. Një sulm simbolik ky, që dëshmon një kritikë domethënëse për Partinë Republikane. Themeluesi i Tesla-s gjithashtu ka kritikuar hapur Peter Navarro-n, i konsideruar si arkitekti i linjës së vijës së ashpër kundër Kinës, duke thënë se diploma e tij në Harvard është “një pengesë për t’u marrë vesh”.
Edhe mbështetësist e tjerë biznesmenë të Trumpit kanë nisur të tregojnë shenja pendimi. Bill Ackman, i cili gjatë fushatës zgjedhore kishte ofruar shumë bujare, tani po bën thirrje për një pauzë 90-ditore në aplikimin e tarifave doganore, duke akuzuar hapur Sekretarin e Tregtisë Lutnick, se dëshiron të shkaktojë kolapsin e ekonomisë amerikane, në mënyrë që të përfitojë prej saj përmes kompanisë së tij Cantor Fitzgerald, aktive në tregun e bonove.
Edhe drejtori ekzekutiv i JPMorgan, Jamie Dimon, e ka shprehur shqetësimin e tij në një letër drejtuar klientëve, duke paralajmëruar se nëse tarifat doganore do të vazhdonin për një afat të gjatë, ato do të dëmtonin marrëdhëniet me aleatët ekonomikë dhe do të gërryenin “përparësinë e jashtëzakonshme që SHBA ka në çështjet botërore”.
Pakënaqësia është shtrirë edhe tek furnizuesit e mëdhenj të naftës, të cilët sipas anketës së fundit të Dallas Fed Energy, kanë filluar të pendohen për “çeqet e bardha” që firmosën për të mbështetur Trump. Rënia e çmimeve të naftës së papërpunuar, e nxitur nga frika e një recesioni të afërt, po e godet rëndë sektorin.
Ndërkohë, gjigantët e teknologjisë si Mark Zuckerberg, Larry Ellison, Jeff Bezos dhe vetë Musk, kanë humbur të paktën 10 miliardë dollarë që nga nisja e punës së administratës së re. Kundërshtarët po rriten edhe brenda radhëve të Partisë Republikane. Bipartizaznizmi shfaqet befas në çështjet tregtare, me konservatorin Rand Paul, i cili po bashkëpunon me demokratin Tim Kaine për një propozim legjislativ për të pezulluar tarifat doganore në Kanada, në pritje të autorizimit të Kongresit.
Po ashtu edhe sy senatorët Mike Lee dhe Ron Johnson, të dy republikanë, po e nxisin presidentin të marrë në konsideratë seriozisht propozimin e von der Leyen për të eliminuar plotësisht tarifat për produktet industriale midis SHBA-së dhe Bashkimit Evropian.
Shqetësimi kryesor i aleatëve të presidentit, është se Trump i sheh tarifat jo si një mjet i përkohshëm për të negociuar marrëveshje tregtare më të favorshme, por si një masë të përhershme, për të mbledhur fonde dhe për të nënshtruar Kinën. Megjithatë, kjo strategji, sipas shumë ekspertëve të ekonomisë, rrezikon të arrijë vetëm një rezultat: dënimin e Shteteve të Bashkuara me recesion.
