Ceremonia e betimit të Presidentit të zgjedhur Donald Trump do të bëhet brenda Kapitolit të hënën, dhe jo jashtë, për shkak të të ftohtit të madh. Kjo është hera e parë në 40 vjet, që ceremonitë presidenciale të SHBA, zhvendosen në ambiente të mbyllura.
“Ka një shpërthim në Arktik që ka përfshirë vendin. Unë nuk dua të shoh njerëz të sëmurë apo të lënduar në asnjë mënyrë,” shkroi të premten Trump në platformën e tij “Truth Social”. “Prandaj, kam urdhëruar që fjalimi i përurimit, me gjithë lutjet dhe fjalimet e tjera, të mbahet në rotondën e Kapitolit të Shteteve të Bashkuara”, shtoi Trump.
Hera e funditkur një përurim i ngjashëm u zhvendos në ambiente të mbyllura për shkak të të ftohtit të ashpër, ishte në vitin 1985, në betimin e dytë të ish-presidentit republikan Ronald Reagan, kur forca e erës pasdite shkoi në intervalin minus 10- minus 20 Fahrenheit (deri minus 23 deri në minus 29 gradë Celsius).
Parashikimi për Uashingtonin të hënën gjatë betimit të Trumpit njofton për një temperaturë rreth 19 F (minus 7 gradë celcius), por pritet të jetë edhe më i ftohtë, e me shumë erë.
Trump tha se mbështetësit mund ta shikojnë ceremoninë prej ekraneve brenda Kapital One Arena, një godinë basketbolli dhe hokej në qendër të Uashingtonit, ku mund të strehohen rreth 20,000 njerëz.
Trump deklaroi po ashtu, se parada e tij presidenciale, e cila supozohej të paraqiste grupe marshimi dhe grupe të tjera që do të lëviznin në rrugën e Pensilvanisë drejt Shtëpisë së Bardhë, do të zhvendoset po në Capital One Arena, duke krijuar paqartësi mes ndjekësve, se si do të organizohej ajo.
