Ndërsa viti shkollor po mbaron, shumë fëmijë duket se po stërmundohen të zgjohen në mëngjes dhe të përqendrohen tek detyrat e shtëpisë.
Simptomat që lidhen me të ashtuquajturën “sindroma e fundvitit shkollor”, nuk kursen as nxënësit më të rritur, duke shkaktuar lodhje, vështirësi për të pushuar, humbje oreksi dhe përqendrim të dobët, për hir të përpjekjeve për “sprintin final”, mes pyetësorëve, testeve dhe provimeve.
Por cilat janë kurat kundër këtij “dembelizmi” e lodhjeje në fund të vitit shkollor?
Çelësi për të luftuar këtë “sindromë”, sipas Elena Bozzola-s, këshilltare e Shoqatës Italiane të Pediatrisë (Sip), është brenda mundësisë së të gjithëve. Ajo lidhet ngushtë me ushqimin e mirë, rutinën e rregullt, gjumin e mirë dhe mbështetjen emocionale nga prindërit.
“Kjo fazë e vitit është sigurisht një kohë stresi psikofizik që nuk duhet nënvlerësuar për nxënësit dhe studentët,” shpjegon ajo për Adnkronos, duke sugjeruar disa masa paraprake për prindërit.
“Lodhja”, siç shpjegoi ekspertja, “lidhet edhe me faktorë mjedisorë, si vapa dhe rritja e orëve të ditës. Aspekte që ndikojnë negativisht tek gjumi. Si fëmijët e vegjël, edhe ata më të mëdhenjtë, priren të qëndrojnë zgjuar, cikli gjumë-zgjim ndryshon dhe kjo ka pasoja në numrin e orëve të gjumit “të mirë”. Dhe nëse një fëmijë fle më pak ose zgjohet disa herë gjatë natës, ndikohet e gjithë dita. Ai është më nervoz dhe nuk ka oreks. Mungesa e oreksit e cila tashmë është fiziologjike kur temperaturat rriten, priremi të hamë pak më pak, por edhe të pimë më pak”, u shpreh Bozzola, kryetare e shoqatës “Fëmija dhe pediatri i tij”.