Një situatë tjetër e paprecedentë ka ndodhur mesditën e sotme në qendër të Tiranës, ku një autobus i unazës ka marrë përpara rreth 5 makina, duke shkaktuar në aksident të shumëfishtë në të cilin rreth 6 qytetarë kanë pësuar dëmtime dhe janë në spitalin e Traumës.
Aksidenti ka ndodhur në urën pranë Tajvanit dhe nga tri prej të plagosurëve janë prej shoferëve të makinave.
Sipas Shefit të Qarkullimit për Tiranën, Taulant Gjoka, dinamika e aksidentit është ende e paqartë, për shkak se sipas kontrolleve paraprake, asnjë prej të përfshirëve në aksident nuk ka qenë nën efektin e alkoolit, dhe dyshimet më të mëdha janë për tejkalimin e shpejtësisë, që mund të ketë shpënë në një aksident të tillë të shumëfishtë.
“Aktualisht në ambientet e Spitalit të Traumës janë 6 persona. Nga të dhënat paraprake që kemi asnjë nga të dëmtuarit nuk ka rrezik për jetën. Nga 6 të dëmtuar, 2 janë drejtues mjetesh dhe drejtuesi i autobusit. Në lidhje me shkaqet e aksidentit është shumë shpejht për të dalë në një përfundim para jush. Dëmet janë të konsiderueshme, ka vend për të dyshuar për shpejtësi por akoma jemi në momentet e para të hetimit”, u shpreh përpara kamerave Gjoka.
Nga deklaratat e shoferit të parë të përfshirë në aksident dhe liruar nga vendngjarja, ka qenë autobusi ai që u ka rënë nga pas, duke shkaktuar këtë aksident të shumëfishtë.
Deklarata e një prej shoferëve
Quhem Ilir, isha vetëm në automjet. Nuk di si të jua them çfarë ndodhi. Ndodhi shumë shpejt, dëgjova zhurma, isha me semafor të kuq i ndaluar. Autobusi më goditi nga pas, nuk e di se çfarë do të kishte ndodhur po të mos kisha frenuar. Nuk kishte makina para meje. Unë mbaj mend që zhurmat erdhën nga mbrapa. Autobusi ishte në ecje, ishte shpejt. Momentin e goditjes dolëm dhe mora pak veten sepse nuk e kuptova se çfarë ndodhi. Mesa pashë unë kishte shumë njerëz të lënduar. Shërbimi i urgjencës erdhi. Shoferi i autobusit ishte i tronditur, ishte tek të 60-at. Ai ishte i shokuar.
Njoftimi i Policisë
Më datë 27.02.2023, rreth orës 11:35, në vendin e quajtur Ura e Tajvanit, një autobus i linjës së Unazës është përplasur me disa automjete. Në vijim të informacionit paraprak të dhënë pak minuta më parë, ku rreth orës 11:35, në vendin e quajtur “Ura e Tajvanit”, një autobus i linjës së Unazës është përplasur me disa automjete, ju sqarojmë se: Si pasojë janë dëmtuar shtetasit: A. Xh., 63 vjeç, (drejtuesi i autobusit), M. S., 35 vjeçe; G. P., 27 vjeç dhe V. P., 27 vjeç; O. G., 52 vjeç dhe J. C., 31 vjeçe, D. N., 27 vjeç, K. A., dhe E. H., të cilët ndodhen nën kujdesin e mjekëve. Pas testit të alkoolit, drejtuesi i autobusit nuk ka rezultuar nën efektin e pijeve alkoolike. Në vendngjarje ndodhen shërbimet e ambulancës dhe shërbimet e Policisë. Grupi hetimor po punon për zbardhjen e rrethanave të aksidentit.
