Kreu i qeverisë Rama, teksa ka folur përpara gjirokastritëve mbi situatën e krizës energjitike dhe rritjes së inflacionit në vend, shkaktuar nga lufta në Ukrainë, nuk ka ngurruar t’u japë edhe një mesazh pedagogëve, të cilët vijiojnë ende grevën për një rritje të pagës prej qeverisë.
Në fjalën e tij Rama tha se qeveria nuk ka ndërmend t’ua rrisë rrogën, se janë me autonomi, e le të bëjnë projekte, ta fusin universitetin në treg e të nxjerrin para.
Dhe ata pedagoëgë medemek! tha Rama. Me një të SHIK-ut në krye, që kërkojnë prapa rritje page në kushtet sot kur jo vetëm u është rritur paga, por u është rritur më shumë se sa të tjerëve. Një pjesë ia ka rritur qeveria, një pjesë ajo autonomia, që shumëkush prej tyre e kujtojnë që është vetëm liri jo përgjegjësi. Jo! Autonomia është në rradhe të parë përgjegjësi. Ata që dalin atje, ta harrojnë që do kenë një rritje tjetër, se rritjen tjetër do ta kenë zjarrëfikësat, rritjen tjetër do ta përgatisim për pensionistat, rritjen tjetër do ta bëjmë për mësuesit, për infermierët për mjekët, rritjen tjetër për policët, rritjen tjetër për ushtarakët. Për ata mesazhi im është shumë i thjeshtë: nuk jeni as si pensionistët, as si ushtarakët, as si punonjësit e policisë, as si mësuesit, as si mjekët, as si infermierët, që marrin një pagë fikse. Jeni me autonomi. Pra një pjesë do ta merrni nga qeveria, një pjesë do ta nxirrni vetë. Do ta nxirrni vetë duke bërë projekte, duke e futur universitetin në treg, duke shfrytëzuar projektet e kështu me radhe. Ne nuk jemi këtu tu bëjmë llogaritë atre, sepse pjesa dërrmuese janë në mësim dhe nuk dalin të bëjnë sellfi tek dera për t’i parë syri qimi, e për t’i nxjerrë pastaj bashkë me mediat e tjera, të cilat kanë halle të tjera.
