Është mbajtur ditën e sotme protesta e radhës së pedagogëve, të cilët kërkojnë përmes saj jo vetëm rritje të pagave, por edhe një rivlerësim të tyre në aspektin financiar, të krejt performancës së tyre.
Mes kërkesave të bëra publike, përfaqësuesit e stafeve akademike kërkuan që greva e tyre të mos përdorej politikisht, por njëkohësisht edhe pedagogu të merrte vlerësimin e meritur.
Sa më poshtë kërkesat e pedagogëve në grevën e sotme:
1.Rritjen e pagave për pedagogët dhe stafin ndihmës-akademik e administrativ
2.Rritjen e financimit për kërkimin shkencor
3.Rivendosjen e shtesave mbi pagë për “Dëmshmëri shëndeti në punë”
4.Rritjen e shtesës mbi pagën për vjetërsinë në punë
5.Rritjen e pagesës së orëve të ngarkesës suplementare
6.Rivlerësimin e orës mësimore
7.Rishikimin e tatimit prej 23% mbi pagesën e ngarkesës suplementare
8.Amendimin pikës C të VKM Nr. 112 për kriteret e marrjes së titullit “Profesor”
9.Për të bërë transparencë mbi buxhetin dhe të ardhurat e universiteteve publike, si dhe përdorimin e tyre
Në një deklaratë bërë më parë për mediat, pedagogët deklaruan se po ushtrohej presion ndaj kolegëve për mos të marrë pjesë në protesta. “Ftojmë tërë kolegët tanë në të gjitha rrethet”, u shprehën ata, këtu në 5 tetor në orën 11:00. Drejtues të institucioneve ju bëjmë thirrje: qëndroni në lartësinë e detyrës, mos intimidoni. Ka pasur kërkesa direkte dhe indirekte për të mos marrë pjesë në protestë. Ne do të qëndrojmë fortë deri në plotësimin e kërkesave. Bojkoti është një nga mënyrat që do të aplikohet” tha përfaqësuesi i sindikatës, në protestën e mbajtur disa ditë më parë, po për të njëjtën problematikë.
Protesta e radhës së pedagogëve, do të mbahet më 17 tetor, ditë edhe kur nis viti akademik për universitetin.
