Përgjatë seancës së sotme të Kuvendit deputetja demokrate Jorida Tabaku ngriti çështjen e largimit në masë të shqiptarëve nga Shqipëria. Në fjalën e saj Tabaku tha se të rinjtë nuk largoheshin prej Shqipërisë nga se Gjermani kishte popullësi të plakur, sic shprehet Rama, por se shohin korrupsionin që ha e pi me qeverinë, se nuk shohin shpresë, se e kuptojnë që janë skllevër të një oligarkie që nuk ofron më asgjë.
Marrëveshja e sotme për ndihmat e mjeteve në lundrim, është një marrëveshje standarte, që nuk ka pse të ketë njeri kundërshtim në parim. Nuk ka pse të bëhet temë debati, kur nuk bëhet fjalë për disa anije më të vogla, mbushur dingas me shqiptarë, që shkojnë në Mbretërinë e Bashkuar. Kjo po, do të ishte një temë interesante, tha Tabaku. Ngaqë ky parlament nuk sheh çdo ditë, se si qindra të rinj, hedhin çantën në shpinë, mbyllin biznese, lënë vende punë, lënë familjen dhe ikin drejt Mbretërisë së Bashkuar. Janë nga 700 deri në 2000 të rinj në ditë, në disa prej ditëve të verës së kaluar, që largohen duke përdorur rrugët ilegale. Me këto shifra, ky parlament nuk e ka luksin të heshtë më, aq më tepër për një tjetër formë biznesi dhe industrie të ngritur, që reklamon dhe marketon shitjen onlajn të rrugëve ilegale, se si mund të shkojë një shqiptar jashtë vendit. E gjithçka nën hundën e një shteti vigjilent, që e justifikon këtë krim, por që nga ana tjetër edhe po shkreton Shqipërinë. Por sigurisht, ky parlament nuk e ka një ditë të diskutojë pse ndodh ky fenomen, pse po ikin shqiptarët nga një vend që nuk ka as luftë civile e as konflikt të armatosur. Pse vetëm për 6 mujorine dytë të 2022-it, kanë emigruar dhe kanë kërkuar azil mbi pesë mijë shqiptarë. Pse të rinjtë shkojnë për të kërkuar një jetë tjetër në Mbretërinë e Bashkuar, në Gjermani, ne Evropë? A po ikin se Gjermania është e plakur, siç thotë qeveria, e po e rinojmë duke plakur Shqipërinë, apo mos vallë ata po ikin, se në këtë vend shohin korrupsionin që ha që pi qe fle me qeverinë çdo ditë. Se janë shqiptarë që shohin se si këtu konkurrenca dhe tregu i lirë nuk ekzistojnë, qytetarë që nuk shohin shpresë, se e kuptojnë që janë skllevër të një oligarkie që nuk ofron më asgjë, qytetarë të një shteti që ligjin nuk e zbaton për të fortin, por e zbaton për të dobëtin, jo për atë që ndërton kulla, por për atë që ndërton avllinë. Ikin sepse politika në përgjithësi, nuk ofron e nuk jep shpresë, tha mes të tjerave Tabaku.
