Sa i takon legalizimit të hashashit në vend, kreu i qeverisë Rama, është shprehur se do të veprojë siç dëshirojnë qytetarët e Shqipërisë, pra do ta legalizojë prodhimin e tij, duke vrarë me një gur tri zogj: plotëson dëshirën e qytetarëve, hap fronte pune dhe ka rritje ekonomike.
“Do bëjmë ashtu siç thonë qytetarët”, iu përgjigj Rama gazetarëve përgjatë konferencës mbi rezultatet e “Këshillimit Kombëtar”, “do liberalizojmë kanabisin mjekësor, do hapim një front pune, do kemi rritje ekonomike, përveçëse rritje në aspektin teknologjik. S’ka dilemë për këtë! Ça kanë thënë qytetarët, do bëhet”.
Ndërkohë që në emisionin “Opinion”, kreu i qeverisë sqaroi se si do të bëhej ky legalizim, në një kohë që pikërisht për shitjen e hashashit në vend, janë dënuar shumë njerëz e po ashtu edhe ish ministri Brendshëm ndodhet në burg.
Ne e kemi fituar betejën me kanabisin, tha Rama, ka mbaruar ajo histori. Në atë histori me kanabisin, ka pasur njerëz të shtetit që janë përlyer, ka pasur nga të gjitha. Eshtë bërë lufta dhe është fituar, ndërkohë që Partia Demokratike, bashkë me kryetarin non grata, thoshte që Lazarati është kështjella e demokracisë. Kur Lazarati ishte zemra e këtij fenomeni. Fakti që ka individë sot, edhe të veshur me shumë pushtet në të kaluarën, të cilët janë në një tjetër hapësirë gjeografike të bashkëjetesës sonë, është sërish një element domethënës në kuadër të reformës në drejtësi. Ka dy elemente legalizimi i kanabisit. Elementi i ligjërimit të përdorimit vetiak, nuk përbën krim dhe as shkelje që të përdorësh kanabisin për përdorim vetiak, brenda një gramature të caktuar, dhe elementi tjetër është ligjërimi i përdorimit të kanabisit për arsye mjekësore, që do të thotë se sot në botë është një industri e tërë farmaceutike, që kanë në bazë kanabis sativën, e që prodhojnë kremëra etj, dhe në rastin tonë është ky element, jo i përdorimit vetiak, që do të thotë ngrihet një industrt e re e kultivimit të kanabisit në kushte komplet kontrolli, janë kushte shumë strikte, laboratorike, me video survejimi rrënjë për rrënjë, se përndryshe nuk ta merr njeri, dhe produkti shkon për eksport, ose mund të përdoret këtu, nëse do të ngrihet këtu industria e përpunimit, nëse do të kemi investitorë për të prodhuar kremra.
Kur Maqedonia e filloi, i sqaroi Rama gazetarit Fevziu që i solli shembull rastin e Maqedonisë në një iniciativë të tillë, nuk ishte kjo situatë, çmimi ishte shumë i lartë, e dyta, është shumë e rëndësishme se çfarë kultivohet dhe se cfarë cilësie ka, tha mes të tjerave Rama në përgjigjen e tij.
