Ministri i Punëve të Brendshme Peleshi ka postuar në faqen e tij në fejsbuk pamje nga shuarja e zjarrit në tragetin “EuroFerry Olympia” t; kompanisë italiane Grimaldi, i cili mesnatën e mbrëmshme është gjendur mes flakëve, duke lëshuar menjëherë sinjalin may day, në kërkim të ndihmës.
Në statusin e tij Peleshi bën me dije se dy anije të Forcës Detare Shqiptare u janë bashkuar përpjekjeve për shuarjen e zjarrit, në operacionin që po kryhet aktualisht brenda ujërave territoriale shqiptare.
Dy anijet të Forcës Detare shqiptare i janë bashkuar përpjekjeve për shuarjen zjarrit në tragetin e linjës Brindizi-Gumenicë të përfshirë nga flakët mbrëmjen e djeshme në det, shkruan Peleshi. Fillimisht zjarri ka rënë jashtë ujërave tona territoriale, por tashmë operacioni po kryhet në ujërat tona, 5 milje larg Porto Palermos. Në operacionin që po drejtohet nga pala greke janë angazhuar edhe anijet e Forcës sonë Detare, Butrinti dhe ajo patrulluese R-117. Më herët pasagjerët dhe pjesëtarët e ekuipazhit janë evakuuar nga anija.
Informacionet për evakuimin e njerëzve nga ky traget, kanë qenë në fakt kaotike. Teksa mediat italiane kanë njoftuar se është kryer me sukses evakuimi i gjithë të pranishmëve në traget, në bregdetin e Korfuzit, pra 237 pasagjerë dhe 51 anëtarë të ekuipazhit mediat greke flasin herë për 10 persona që mungojnë e herë për 2 të tjerë që kanë ngecur brenda anijes.
Sipas zëdhënësit të kompanisë Grimaldi, së cilës i përket edhe trageti, shkaqet e zjarrit nuk dihen ende, dhe për këtë kanë nisur hetimet. Zjarri, sipas njoftimeve të vetë të pranishmëve në bord, kishte rënë në mesnatë, dhe rreth orës 4.20 të mëngjesit, ekuipazhi kishte nisur të thërriste për ndihmë.
