Kanë reaguar sërish ditën e sotme deputetët e Partisë Demokratike Luan Baçi dhe Eralda Tase, të cilët nga një deklaratë për shtyp nga landfilli i Mbrostarit, i ka ftuar qytetarët fierakë të reagojnë ndaj kësaj ndotjeje që po i bëhet qytetit, duke i kërkuar madje dëmshpërblim bashkisë për dëmin që po i shkakton shëndetit të tyre.
Në deklaratën e tij përpara gazetarëve, Baçi u shpreh se ndodheshin aty për të denoncuar aferën korruptive të mbetjeve, e cila sipas tij, është kryer në bashkëpunim me inceneratorin.
Jemi këtu për të denoncuar sërish këtë aferë korruptive, tha ai, një aferë korruptive do ta cilësoja në bashkëpunim me inceneratorin, i cili ka thithur rreth 26.5 milionë euro dhe nuk është bërë ende. Pavarësisht deklaratës së tyre, që është bërë përpara disa diësh, që është gati që nga data 2-25 maj dhe ka pritur të fillojë punë. Këtu duhet të dalë përgjegjësia. Përse Bashkia që prej datës 25 maj që sipas kontratës, inceneratori ka qenë gati për të filluar punë, përse nuk i është përgjigjur asaj periudhe? Ndjesë për tymin që po thithni sot, por është një fakt kuptimplotë se në çfarë situate ndodhet qyteti i Fierit sot dhe ne, bashke me ju, që po bëjmë këtë deklaratë për mediat. E njëjta situatë është në të gjithë qytetin e Fierit, e njëjta situatë është në çdo shtëpi në Fier, ku ka mbërritur tymi dhe bloza deri në plazh, deri në atë të detit. Unë jam këtu bashkë me kolegen Eralda Tase, për të ndërgjegjësuar qytetarët fierakë që të reagojnë ndaj kësaj situate. Do të thosha që t’i drejtohemi Gjykatës për t’u dëmshpërblyer nga Bashkia, për këtë dëm të shkaktuar në shëndetin e qytetarëve fierakë.
