Është zbuluar ditën e sotme se të kujt ishin tërë ato para që mëmë e bir, zbuluar prej operacionit të koduar policor “Inside”, kishin vjedhur dhe fshehur nëpër tubat e aspirimit.
Nga sa bëhet me dije prej shumë mediave në vend, shtëpia e vjedhur prej R. D. dhe H. D. (nënë e bir), i takonte ish shefes së Kabinetit të ish zv/kryeministrit Arben Ahmetaj.
Shuma e parave gjetur në shtëpinë e dy vjedhësve si provë materiale, sipas deklaratave të policisë, është (deklaratën e parë) 8 milionë lekë të rinj, sende me vlerë, të cilat arrijnë në vlerë totale, rreth 120 mijë euro, 150 euro, 7000 dollarë, 368 000 lekë të rinj, sende me vlerë (aksesorë floriri) dhe 404 800 euro, 8500 dollarë dhe aksesorë flori (deklaratën e dytë).
Nuk dihet ende se si ka mundur ish shefja e Kabinetit të Ahmetajt ta vërë të këtë pasuri, vjedhur më pas prej R.D dhe H.D., por lajmi po bën xhiron e rrjetit, duke ngritur dyshime të shumta.
Aktualisht zonja A. K është zyrtare në Autoritetin e Mbikqyrjes Financiare. Më herët ka punuar në Kryeministri si shefe kabineti e ish-zv.kryeministrit Arben Ahmetaj.
Njoftimi i parë i Policisë Tiranë
Finalizohet operacioni policor i koduar “Inside”.
Operacioni u zhvillua nga Komisariati i Policisë Nr. 2, si rezultat i një hetimi me metoda speciale proaktive. Vodhën në një banesë, shuma të konsiderueshme parash dhe sende me vlerë, vihen në pranga ish-punonjësja e mirëmbajtjes së kësaj banese dhe djali i saj. Sekuestrohen mbi 8 milionë lekë të rinj të dyshuar të vjedhur në këtë banesë, sende me vlerë, 3 automjete, 2 prej tyre të blera me paratë e vjedhura, si dhe veshje të përdorura gjatë kryerjes së këtij krimi. Shërbimet e Komisariatit të Policisë Nr. 2, si rezultat i provave të siguruara falë një pune të mirëfilltë hetimore, trejavore, të realizuar me metoda speciale hetimi, në bashkëpunim me Prokurorinë pranë Gjykatës së Rrethit Gjyqësor Tiranë, kanë organizuar dhe finalizuar operacionin policor të koduar “Inside”. Si rezultat i këtij operacioni, u bë ndalimi i shtetasve:
- R. D., 49 vjeçe dhe H. D., 23 vjeç (nënë e bir), të dy banues në Tiranë.
Nga provat e siguruara në kuadër të këtij operacioni, rezultoi se gjatë periudhës që shtetasja R. D. ka qenë e punësuar për mirëmbajtjen e një banese në rrugën e Kosovarëve, kjo shtetase, në bashkëpunim me shtetasin H. D. (djali i saj), ka vjedhur në këtë banesë, shuma të konsiderueshme parash dhe sende me vlerë, të cilat arrijnë në vlerë totale, rreth 120 mijë euro. Gjatë kontrollit të banesës së shtetasve të arrestuar, shërbimet e Policisë gjetën dhe sekuestruan në cilësinë e provës materiale, 58 150 euro, 7000 dollarë, 368 000 lekë të rinj, sende me vlerë (aksesorë floriri), 3 automjete, 2 prej tyre të blera nga paratë e vjedhura, si dhe veshje të përdorura gjatë kryerjes së kësaj veprimtarie. Materialet procedurale i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme.
Njoftimi i dytë i Policisë Tiranë
Vijon operacioni policor i koduar “Inside”. Gjenden dhe sekuestrohen edhe 404 800 euro, 8500 dollarë dhe aksesorë floriri, në banesën e dy autorëve të arrestuar gjatë operacionit ditën e djeshme. Shërbimet e Komisariatit të Policisë Nr. 2, në vijim të operacionit policor të koduar “Inside”, gjatë të cilit u arrestuan shtetasit R. D. dhe H. D., nisur nga dyshimet e krijuara, mbi shumën e vjedhur në banesën në Rrugën e Kosovarëve, bazuar në inteligjencën informative dhe veprimet hetimore të thelluara kanë ushtruar rikontroll në banesë. Gjatë kontrollit në banesë, shërbimet e Policisë gjetën të fshehura në tubin e aspirimit, 404 800 euro, 8500 dollarë dhe aksesorë floriri, të cilat u sekuestruan në cilësinë e provës materiale. Materialet i kaluan Prokurorisë, për veprime të mëtejshme procedurale.
