Ambasadorja amerikane Yuri Kim ka hedhur në instagramin e saj një sërë fotosh nga ngjitja në malin e Korabit, të cilin thotë se e ka ndërmarrë për t’u bërë gati për sezonin e ri.
Nuk e di nëse është ngase rrënjët familjare unë i kam në mal, shkruan Kim bri fotove në Instagram, por gjej përherë forcë dhe frymëzim, sa herë që ndodhem Alpeve të Shqipërisë. Mendoj se malësorët janë njësoj, pavarësisht vendeve. Në fund të verës reflektova mbi sfidat dhe shanset e së ardhmes. Vendosa të përgatitem për sezonin e ri, duke u ngjitur në majën më të lartë të Shqipërisë, Korabin. 2764 metra! Nuk isha më e shpejta, as më e forta, dhe u desh më shumë kohë nga sa ishte parashikuar, por rezistuam dhe mbërritëm në majë. Më kujtoi rëndësinë e të mbajturit të përqendrimit tek objektivi, e të qenit të rrethuar nga miq që të inkurajojnë e të ndjekin deri në fund, pa u dorëzuar kurrë. Njërën këmbë pas tjetrës, njërin hap pas tjetrit, mund të mbërrijmë së bashku objektivin tonë, përfundon ambasadorja amerikane Yuri Kim shënimin e vet, me gjasa, një mesazh ky edhe për klasën politike shqiptare, e cila më 10 shtator i rikthehet jetës parlamentare dhe politikës aktive në vend.
