EUROPOL ka arrestuar ditën e sotme 28 persona, të përfshirë në krimin kibernetik. Sipas njoftimit të Suela Bonjakut, specialiste në Sektorin e Hetimeve të Krimeve Kompjuterike, autoritete nga Shqipëria, Austria, Belgjika, Kolumbia, Kroacia, Greqia, Hungaria, Irlanda, Italia, Gjeorgjia, Holanda, Maqedonia e Veriut, Polonia, Portugalia, Sllovenia, Sllovakia, Spanja, Zvicra dhe Shtetet e Bashkuara të Amerikës, “të mbështetura nga EUROPOL dhe Këshilli i Rrezikut të Tregtarëve, bashkuan forcat në një veprim të koordinuar kundër mashtrimeve në internet, duke zhvilluar një operacion në shkallë të gjerë, nga data 1 deri në datën 31 tetor, si pjesë e Veprimit të Tregtisë Elektronike 2021.
Modus operandi i kësaj veprimtarie kriminale, thuhet në deklaratën e policisë, përfshinte përdorimin e disa aplikacioneve në telefonat celularë, të cilat lidheshin me bankat për të kryer transferime dhe blerje në mënyrë të paligjshme. Si rezultat i operacionit u arrestuan 28 persona në vendet pjesëmarrëse, si të dyshuar për mashtrimin me transaksione”.
Në këtë kuadër, vendet pjesëmarrëse kanë nisur fushatën #SellSafe, për të ndihmuar shtetasit që të kuptojnë rreziqet e mashtrimit gjatë tregtisë në rrjet.
