Në garën e madhe të prodhimit dhe futjes në treg të vaksinave anti-covid, Kina konkurron aktualisht me dy të tilla, Sinovax-in dhe Sinopharm-in, të cilat me gjasa mbërrijnë së shpejti edhe në Shqipëri, të paktën sipas deklarave të bëra zyrtare.
Por si funksionojnë vaksinat kineze?
Ndryshe nga Moderna dhe Pfizer, të cilat janë vaksina me mRNA, që do të thotë se në trup injektohet një pjesë e kodit gjenetik të koronavirusit, që nxit prodhimin e proteinave virale për të stërvitur sistemin imunitar, vaksinat kineze funksionojnë duke përdorur thërrmija virusi të vrara, të cilat injektohen në trup, duke u përpjekur ta nxisin kështu reagimin imunitar. CoronaVax është një metodë më tradicionale e vaksinës, e cila është përdorur me shumë sukses në një tjetër vaksinë tejet të njohura si ajo ne tërbimit, shprehet për BBC-në profesor Luo Dahai nga Nanyang Technological University. Kurse vaksinat mRNA janë një tip i ri vaksine dhe aktualisht nuk ekziston asnjë shembull suksesi i tyre në popullësi.
Sa e efektshmë është kjo vaksinë?
Sipas mediave britanike, një studim kinez i publikuar në revistën shkencore The Lancet, ka informacione vetëm për fazën e parë dhe e dytë të eksperimentimit të CoronaVax në Kinë. Zhu Fengcai, një prej autorëve të materialit, shprehet se rezultatet e marra nga 144 pacientë në fazën e parë dhe 600 në të dytën, dëshmojnë se vaksina është e përshtatshme për përdorim emergjence. Vetë CoronaVax, sipas burimeve mediatike, u është nënshtruar provave të fazës 3 në mjaft vende të ndryshme. Të dhënat provizore të studimeve në fazë të përparuar në Turqi e Indonezi, dëshmuan se kjo vaksinë qe efektshme respektivisht nga 91.25% në 65.3%
Ndërkaq, kërkuesit shkencor në Brazil, pohuan fillimisht se në studimet e tyre, kjo vaksinë rezultoi 78% e vlefshme, një rezultat i cili u korrigjua më pas në janar të 2021-it, duke e shpënë këtë shifër në 50,4%, për shkak se në përllogaritjet e tyre kishin përfshirë të dhëna shtesë. Në fillim të nëntorit 2020, eksperimentimet në këtë vend u ndërprenë për shkak të vdekjes së një vullnetari, por u rimorën sërish pasi u zbulua se vdekja nuk kishte lidhje me vaksinën.
Sinovax është miratuar për përdorim emergjence në grupet me rrezik të lartë në Kinë, që prej korrikut.
Po Sinopharm?
Sinopharm, një shoqëri shtetërore kineze, ka zhvilluar dy vaksina covid 19, të cilat, ashtu si SinoVax, janë vaksina të paaktivizuara që funksionojnë po njësoj.
Në 30 dhjetor, Sinopharm deklaroi se studimet e fazës 3 të vaksinës, e dëshmonin atë 79% më të efektshme, krahasuar me vaksinat e Pfizer-it e Moderna-s. Ndërkaq, Emiratet e Bashakuara Arabe, të cilat miratuan një vaksinë të tillë, pohuan se ajo, sipas rezultateve të fazës 3, ishte e efektshme 86%. Sa i takonte mospërputhshmërisë së shifrës së efektivitetit, zëdhënësit u shprehën se sqarimet do jepeshin në vijim, por ende pa u zbardhur ato, vaksina u qe shpërndarë tashmë rreth 1 milionë personave në Kinë, në kuadër të një programi emergjence.
Në fillim të dhjetorit, Peruja i pezulloi eksperimentimet për vaksinën Sinopharm, për shkak të një “pasoje të rëndë” që pati një vullnetar. Më pas ky vendim u anulluar, gjë që nuk është e rrallë në një eksperiment klinik. Mbretëria e Bashkuar bëri po të njëjtën gjë me një tjetër vaksinë anti-covid, duke e rinisur sërisht eksperimentimin klinik, pasi u përjashtua mundësia se vaksina mund të ishte shkak i vdekjes.
Por Kina nuk po prodhon vetëm këto vaksina. Sipas një shkrimi në The Conversation, ajo po prodhon edhe dy vaksina të tjera. Njëra prej tyre është CanSino Biologics, që sipas informacioneve të dhëna është në fazën tre të studimeve klinike në vende si Arabia Saudite, kurse tjetra është zhvilluar prej Anhui Zhifei Longcom, vaksina e së cilës përdor një pjesë të purifikuar të virusit, për të nxitur një përgjigje imunitare dhe, sipas të dhënave ka hyrë në studimet e fazës 3.
Vendet që kanë firmosur për marrjen e vaksinës kineze nuk janë të pakta. Mes tyre hyjnë Singapori, Malajzi, Filipinet, Turqia, Brazili e Kili të cilët kanë firmosur marrëveshje me Sinovax-in. Ndërkaq, Emiratet e Bashkuara Arabe dhe Bahreini, kanë miratuar Sinopharm-in.
FDA, Agjencia e Barnave Amerikane dhe EMA, Agjencia e Barnave Europiane, nuk i kanë miratuar ende për përdorim.
Copyright © MetropolPost.al
