Teksa ka deklarruar rritjen e të prekurëve me variantin Delta në vend, në mbledhjen e sotme, Komiteti Teknik i Ekspertëve, ka vendosur të mos ndryshojë asnjë masë nga aktualet në fuqi për parandalimin e përhapjes së virusit. Sipas shifrave të deklaruara nga drejtoresha e ISHP-së Fico, mesatarja javore e rasteve të reja ka shkuar në 482 raste, nga 291 krahasuar me një javë përpara ose me javën 33. Numri total i rasteve aktiv në vend është rritur, nga 5573 në 5792, që çon, sipas saj, në rritje të incidencës dy javore me rreth 5 herë nga dy javë të shkuara. Incidenca dy javore është 202 raste të reja për 100 mijë banorë, sqaroi Fico, krahasuar kjo me 38 raste të reja për 100 mijë banorë në dy javorshin pararendës dhe raporti i fataliteteve mbi rastin e infeksioneve, është 1.8%.
Drejtoreha e ISHP-së Albana Fico theksoi gjithashtu se një rritje të infektuarëve vihet re tek grupmoshat nga 30 deri në 60 vjeç, dhe se bashkitë më të prekura rezultojnë Saranda, Himara, Malësi e Malësi e Madhe, Shkodra, Tirana dhe Vlora.
Në këtë kontekst, bëri me dije zëvendësministrja e Shëndetësisë Racakolli, masat në fuqi janë mëse të mjaftueshme për parandalimin e përhapjes së virusit, ndaj, ato mbeten në fuqi.
Situata mund të kontrollohet duke mbajtur të njëjtin nivel masash, tha Racakolli, po duke i zbatuar ato me përgjegjshmëri dhe rigorozitet si dhe intensifikimi më tej i procesit të vaksinimit. Po i përmend edhe një herë masat që janë në fuqi, e që mendojmë se e kontrollojnë shumë mirë situatën: detyrimi i mbajtjes së maskës në të gjitha ambientet e mbyllura dhe në ato ambiente ku nuk mund të sigurohet distancimi social, duke vënë në një vëmendje të shtuar qendrat tregtare, supermarketet, dhe sidomos aeroportet, ku është vënë re që ka një mospërdorim të maskave.
Grumbullimet në ambientet e jashtme do të lejohen deri në 50 persona, duke respektuar gjithnjë rregullat e distancimit social, si dhe të zbatimit me rigorozitet të rregullave të ISHP–së.
Ora policore, mbetet në fuqi nga ora 24.00- deri në 06 të mëngjesit dhe po ashtu muzika do të jetë e lejuar deri në orën 23.
Lejohen kampionatet sportive me prezencë të reduktuar deri në 30 % dhe në zbatim të protokolleve të ISHP-së
Vijojnë të lejohen teatrot, konferencat, shfaqjet kulturore, edhe këto me kapacitet të reduktuar deri në 30 %, sipas protokolleve të ISHP-së.
