Policia e Shtetit ka njoftuar se nën drejtimin e Prokurorisë së Rrethit Gjyqësor Tiranë, kanë nisur veprimet proceduriale për kqyrjen e ambienteve të selisë blu, ku u zhvillua ngjarja që degradoi në dhunë mes demokratëve.
Sipas statusit të publikuar nga vetë Policia e Shtetit, do të mblidhen me cilësinë e provës materiale të gjitha provat, në mënyrë që të kuptohet e gjithë dinamika e ngjarjes e për të shpënë përpara drejtësisë, të gjithë ata që u përfshinë në këtë akt dhune.
Statusi i plotë i Policisë së Shtetit
Nën drejtimin e Prokurorisë së Rrethit Gjyqësor Tiranë ka filluar kryerja e veprimeve procedurale, në selinë e Partisë Demokratike, për këqyrjen e çdo ambienti ku u zhvillua ngjarja që degradoi në përdorimin e dhunës.
Duke filluar nga jashtë, deri në të gjitha ambientet e brendshme të selisë, do të bëhet këqyrja dhe do të mblidhet çdo provë e paligjshmërisë që karakterizoi ngjarjen e dhunshme.
Do të sekuestrohen në cilësinë e provës materiale të gjitha provat, në funksion të hetimit, si dhe do të kryhet me rigorozitet e paanësi të plotë ligjore, çdo veprim procedural i nevojshëm, me qëllim zbardhjen e plotë të të gjithë dinamikës së kësaj ngjarjeje dhe identifikimin e autorëve të përfshirë ne akte dhune, për të garantuar nxjerrjen e tyre pa dallim, para drejtësisë.
Në vijim do të ketë njoftime të tjera lidhur me këtë situatë.
Policia e Shtetit mbetet e angazhuar për garantimin e rendit dhe të sigurisë publike dhe çdo akuzë apo insinuatë me sfond politik ndaj saj është thjesht e papranueshme.
