Në takimin për klimën në Glasgou, COP26, presidenti amerikan Biden ka qortuar liderat e Rusisë dhe Kinës, për mospjesëmarrjen e tyre në takimin e Glasgout, duke u shprehur se “kanë bërë një gabim të madh”.
Gjatë fjalës së tij të martën mbrëma, Biden u shpreh se “çështja e klimës qe një problem i madh”, të cilit Kina “iu largua”, duke shtuar se po të njëjtën gjë ka bërë edhe Putini e Rusia.
Dy presidentët, si Putin, ashtu edhe Xi Jiping, edhe pse kanë dërguar delegacionet e tyre në takimin e Glasgout mbi klimën, nuk janë të pranishëm personalisht si liderat e vendeve të tjera.
Në listën e ndotësve më të mëdhenj të klimës, Kina është emetuesi më i madh i dioksidit të karbonit, ndjekur prej Shteteve të Bashkuara, kurse Rusia renditet e pesta pas Bashkimit Evropian dhe Indisë.
Në takimin e Glasgout u paraqitën më shumë se 120 lidera, vendet e të cilëve nënshkruan marrëveshje të rëndësishme, mes së cilave ajo për të ulur nivelet e metanit brenda 2030-s, e po ashtu edhe dhënies fund të shpyllëzimit, po brenda të njëjtit vit.
Si Kina, ashtu dhe Rusia janë firmëtarë të nismës për të ndalur shpyllëzimin, madje në një takim virtual mbajtur ditëve të COP26, Putin deklaroi se edhe përpara kësaj marrëveshjeje, Rusia ushtronte masa të forta për ruajtjen e pyjeve.
