Teksa në faqen e Kadastrës Shqiptare është publikuar lajmi mbi zbatimin e ligjit 20/ 2020 për tokën bujqësore, si dhe miratimet e VKM-ve 1147 e 1182/2020 për marrjen e aktit të pronësisë së tokës, një sërë qytetarësh kanë adresuar shqetësimet e tyre mbi pronën dhe aktet e pronësive përkatëse, bujqësore ose jo.
Në sy bie masa e madhe e ankesave, një pjesë e mirë e të cilave lidhen me vonesat e përgjigjeve nga ana e hipotekave, por nuk mungojnë edhe pandehmat se miratimi i ligjit në fjalë, nuk është gjë tjetër, veçse një lëvizje elektorale, e cila pas marrjes së votës, do t’i lërë pronat po në të njëjtin kaos.
Por çfarë thotë ligji20/2020 për tokën dhe dy VKM-të e miratuara në ndihmë të tij?
Sipas kreut të Kadastrës Shqiptare, z. Lame, ligji 20/2020 “Për përfundimin e proceseve kalimtare të pronësisë në RSH” do të përmbyllë gjithë problematikën e pronave në Shqipëri gjatë këtyre tri dekadave demokraci. Ky proces do të përfshijë: – pajisjen me AMTP (Akti i Marrjes së Tokës në Pronësi) të tërë familjeve e kategorive për të cilat nuk është bërë; – regjistrimin dhe çertifikimin e gjithë pronës në fshat.
Për të ndihmuar këtë proces, po sipas kreut të Kadastrës Shqiptare, në dhjetor 2020, u miratuan edhe dy nga aktet nënligjore më të rëndësishme të këtij ligji, VKM-të 1147 dhe 1182 të dhjetorit 2020, risitë e të cilave përfshijnë (cit. Kadastra Shqiptare, fb):
1. Për AMTP e regjistruara përpara hyrjes në fuqi të ligjit 20/2020, nuk shqyrtohet më legjitimiteti i titullmbajtësit. Pra pronarët do ta disponojnë lirisht pronën.
2. Në kategorinë e AMTP-ve të regjistrueshme, janë shtuar edhe AMTP që janë lëshuar për personat që u është hequr e drejta e pronësisë me krijimin e ish-kooperativave bujqësore apo ish-ndërmarrjeve bujqësore ose trashëgimtarët e tyre.
3. Nuk shqrytohet më sipërfaqja e përfituar me AMTP në raport me sipërfaqen takuese sipas normës për frymë.
4. Llojet e tokës së përfituar me AMTP, për të cilat nuk regjistrohet AMTP-ja mbeten vetëm vetëm 4:
a) truall;
b) vepër e infrastrukturës publike;
c) rërë bregdetare, plazh;
d) sipërfaqe ujore.
Pra është hapur rruga për regjistrimet e llojeve deri dje të përjashtuara si kullota, toka për frymë, etj.
5. Shqyrtimi i dokumentacionit të ndarjes së tokës bujqësore, kryhet vetëm nga ASHK.
6. Krijohet mundësia e blerjes së sipërfaqes që posedohet mbi atë cfarë përcaktohet në titullin e pronësisë apo dokumentin e përdorimit.
7. Krijohet mundësia e regjistrimit apo edhe përfitimit të aktit të pronësisë për tokën që disponohet në fakt, pavarësisht se ku mund ta jetë përcaktuar vendndodhja sipas AMTP/dokumentacionit të ndarjes së tokës bujqësore, kur s’ka konflikte.
8. Në kategorinë përfituesve, kur janë përdorues faktikë të tokës bujqësore, janë shtuar personat që u është hequr e drejta e pronësisë me krijimin e ish-kooperativave bujqësore apo ish-ndërmarrjeve bujqësore ose trashëgimtarët e tyre
Pika 3 e lehtësirave të krijuara më sipër, bën fjalë për të gjitha ato familje ku, sasia e tokës të cilën disponojnë, nuk përputhet me atë që do të duhet të kishin marrë në zbatim të ligjit 7501/1991.
