Kreu i SPAK-ut, Arben Kraja ka dhënë disa shpjegime përpara gazetares Elona Meço se përse hetimet mbi inceneratorët nuk kanë përfunduar ende.
Sepse në atë lloj aktiviteti janë tri inceneratorë, tha Kraja, pra kemi tri cështje penale, të Elbasanit, të Fierit dhe të Tiranës, dhe për secilën prej tyre janë të përfshira disa insitucione, disa ministri, me praktika pune, me miratim aktesh ligjore, nënligjore, dhe marrëveshjet me lidhjen e kontratave. Kështu që është një veprimtari shumë e gjerë, shumë komplekse, e cila kërkon kohën e duhur për tu hetuar. Në situata të tilla duhet të hetosh të gjitha detajet, qoftë edhe problemet administrative, që të kuptosh se ku është shkelja penale, për të ngarkuar me përgjegjësi penale pas autorët e shkeljes. Ne kemi ecur mirë, janë bërë publike disa nga rezultatet, por ka ende punë për tu sqaruar deri në fund. Të gjitha janë cështje të hetimit dhe unë nuk mund të jap përgjigje pse është ky brenda dhe pse është ky jashtë. Duhet të presim derisa të kryhen të gjitha hetimet e të sqarohet situata, përfundoi sqarimin e tij, kreu i SPAK-ut Arben Kraja
