Pas dorëzimit ditën e djeshme në kryesinë e PD-së të 4200 fletëve të firmosura prej delegatëve të Kuvendit, për thirrjen e Kuvendit, kryetari i Këshillit Kombëtar të PD-së Edi Paloka, ku dhe janë depozituar fletët e firmosura, ka thirrur në zyrën e tij mediat, me qëllimin konfirmimin e firmave të depozituara në zyrën e tij.
Paloka u kërkoi gazetarëve t’i numëronin fletët e firmosura, por me kushtin që të mos e tregonin identitetin e delegatëve, sepse ajo do të bëhej e ditur vetëm ditën e Kuvendit.
Janë 4200, firmosur nga delegatët,tha Paloka. Kush janë delegatët? Anëtarë të Këshillit Kombëtar, deputetë, përfaqësuesit e degëve. Nuk janë anëtarë të thjeshtë të PD-së, janë fiks delegatë të kuvendit të PD, dhe delegatët nuk ndryshojnë, nga njëri Kuvend në tjetrin. Janë nga kryetarë seksioni, deri në kryetarë partish. Janë të gjitha të dhënat, emër, mbiemrin, emrin e babës dhe funksionin në parti që i bën delegatë.
Emrat ju lutem mos i fokusoni. Gazetarët të ulen, e t’i numërojnë, nga 1 deri tek 4200a. Unë e di që ju nuk i njihni delegatët, as unë nuk i njoh. Këto i bën Komisioni i mandateve të Kuvendit. Unë kur të kem kontakt me firmëtarët do t”ju kërkoj një gjë, që do të ishte e mirë e për PD-në dhe këtë kuvend: që atë ditë t’i marrin e t’i lexojnë me radhë. Mendoj se kjo do ishte gjëja më e mirë, për të verifikuar emrat dhe transparencën e këtij procesi, theksoi mes të tjerave Paloka.
