Një shëtitje e zakonshme në Drilon si për fillimviti, të zbulon shumëçka tjetër përveçese parkut të dikurshëm, vizituar për herë të fundit jo më larg se një vit më parë.
Tanimë gjelbërimi në hyrje të këtij parku natyror, njohur prej të gjithëve si një prej vendeve më të bukura Pogradecit, është zëvendësuar prej vragave të rrotave të eskavatorëve që vijojnë punën, duke të futur në mëdyshje, a ke hyrë në parkun e Drilonit apo ke ngatërruar udhë.
Eskavatorë, punëtorë, tabela “kujdes, këtu punohet”, dhe pak njerëz me fëmijë, që bëjnë kujdes tek ecin e shkojnë tutje, drejt urës së “pellgut” të parkut natyor.
– Çfarë po ndodh? pyes një punonjës që, nisur nga kapela dhe veshja që mbante, duhej të ishte pjesë e punimeve që po kryheshin. – Po kryen punime, më thotë, Fondi Amerikan… – E çfarë punimeve, e pyes. – Kanal vaditje, instalimet elektrike, tubacione vaditjeje, komplet uji i pijëshëm, stacione pompimi… – E sa do të zgjasë, e pyes. – Deri në fund të vitit, më thotë, por në fillim të sezonit mendohet të hapet. – Se mos bëhet e tëra beton ore, vazhdoj unë, e trembur prej ndonjë betonizimi të mundshëm edhe të Drilonit. – Jo, jo, ma kthen. – Ka një pjesë të përfunduar pranë Kartodromit, shko shihe si do të bëhet.
Dhe shkova. Nuk ndjeva ndonjë ndryshim kush e di se çfarë krahasuar me atë që ka qenë parku i Drilonit, por të paktën ishte hapësirë e rregullt.
Sipas tabelës së punimeve, projekti “Parku Ujor Tushemisht-Drilon”, i miratuar me vendim numër 25, me 25. 01.2022, financohet nga Fonadacioni Amerikan i Zhvillimit (AADF), me përfitues Bashkinë Pogradec, me vlerë të punimeve 5 563 505 05 dollarë, me afat realizimi brenda 17 muajve dhe me datë nisjeje projekti që më Shkurt të 2022-it.
Pra, në fillim të këtij sezoni veror, projekti “Parku Ujor Tushemisht-Drilon” duhet të jetë gati.
Personalisht, lutem me shpirt që kur të shkojmë sërish për të ushqyer mjelmat (unë nuk do rrezikohej gjatë verës, por nga shtatori them), të mos gjejmë beton por atë gjelbërim aq të dëshiruar e të lakmuar prej të gjithëve.
Nga Albana Nexhipi Lekaj
