Ka nisur ditën e djeshme sezoni i ri parlamentar 2021-2022, i cili është karakterizuar nga fryma e debatit dhe e mosmarrëveshjeve mes dy kampeve politike në sallë.
Gjatë votimit të kandidaturës së Lindita Nikollës në krye të Parlamentit, opozita ka reaguar duke grisur fletët e votimit dhe hedhur ato jashtë kutisë së votimit, e po ashtu, teksa Nikolla mbante fjalën e saj përshëndetëse si kryetarja e re e Kuvendit, opozitarët të pranishëm në sallë, përplasën duart mbi tryezat respektive, për t’u larguar më pas nga salla, së bashku me krerët e opozitës së Bashkuar, Lulëzim Bashën dhe Monika Kryemadhin.
Pavarësisht reagimit të opozitës, Nikolla gëzon mbështetjen e kreut të PS-së Rama, mbështetje e cila u shpreh ditën e djeshme edhe me një përqafim mes saj dhe kreut Rama.
Nga votimi në sallë, Nikolla u zgjodh kryetare e Parlamentit me 79 vota pro, nga 83 që kishin qenë të vlefshme brenda kutisë së votimit.
