Mondi i thotë çunit “futja m’grusht mër bab” kur ai i tregon si u grind me një shok te shkolla, Besa i tregon zyshës me ulërima në sy të çunit se kush kishte të drejtë te sherri i djeshëm në klasë, Andi sheh çunin që po shkrihet me plehrat e fundit të hip-hopit me pistoleta e kokainë dhe këndon bashkë me të se “e ka baba shok”, Raqi admiron lekët që ka bërë 16-vjeçari i vet duke shitur hashash te shkolla e lagjes me shprehjen “e kam të shkathët mistrecin”, Mira dëgjon gocat e lagjes me fjalor burgaxhinjsh dhe u tërheq vërejtjen plot dashamirësi se ashtu flasin vetëm çunat, Titi i tregon gruas me afsh e pasion para fëmijëve gojëhapur se çfarë do t’i bëjë komshiut të katit të sipërm që i ka lënë prapë ujin e vazove të rrjedhë të ballkoni yt, Sonila i thotë burrit “hë mo se e meritonte ajo, kruhej vetë” për vajzën te pallati përballë që përdhunuan dje, Berti kthen kokën në anën tjetër kur sheh fëmijët e lagjes duke u rrahur si kafshë me njeri-tjetrin teksa mendon “është problem i prindërve të vet”, ti zbavitesh me ministrin a deputetin që thur sonete ndyrësie në tribunën e kuvendit dhe i thua fëmijëve adoleshentë “ky është gallatë fare”, ndërsa unë i jap dorën gjykatësit që pardje liroi Gencin e Bedries megjithëse prokurori vërtetoi se kishtë bërë shoshë me thikë një gjynafqar për një vend parkimi.
Pastaj në darkë, TË GJITHË NE shohim lajmet e orës 20.00 dhe përmbysim me lot e qyrre rrjetet sociale me revoltën tonë ndaj dhunuesve që u japim dorën, kafen, përshëndetjen, borxhin, votën dhe respektin çdo ditë të jetës sonë prej të zemëruari virtual.
* Titulli redaksional.
