Është ndarë nga jeta ditën e djeshme Dr. Sazan Gabrani, një prej njerëzve që ka kontribuar gjithë jetën në përgatitjen e mjekëve të rinj në vend.
Fakulteti i Mjekësisë i shpreh nderimet e tij, duke kujtuar njëkohësisht karrierën dhe kontributin e profesor Gabranit.
Sa më poshtë, shënimi i plotë i Fakultetit të Mjekësisë.
Me keqardhje ju njoftojmë për ndarjen nga jeta të Prof. Dr. Sazan Gabranit.
Prof. Dr. Sazan Gabrani ka lindur në Tiranë dhe ka mbaruar studimet e larta në Universitetin e Tiranës, në degën Mjekësi e Përgjithëshme në vitin 1968. Në periudhën kohore 1968-1972 ka punuar si mjek pediatër në shërbimin ambulator dhe në Spitalin e Lagjes Nr. 6, Tiranë.
Në gusht të vitit 1972, ka filluar punë në Katedrën Anatomi-Histologji, si asistent i lëndës së Anatomisë Normale të Njeriut. Që nga ajo kohë e në vazhdim, ka punuar për ngritjen e tij profesionale e shkencore. Pas likuidimit të 4 provimeve pasuniveritare, sipas sistemit të kualifikimt pasuniveritar të asaj kohe, në vitin 1982 ka mbrojtur disertacionin me temë: “Anatomia e harkut të aortës dhe variacionet e degëve të tij” dhe me vendim të Komisionit të Lartë të Atestimit, ka marrë gradën shkencore ‘Kandidat i Shkencave Mjkekësore”, gradë e cila me vendim 351, dt. 30.06.1993, u konvertua në gradën shkencore “Doktor i Shkencave”.
Në vitin 1994, ka marrë titullin Profesor. Për një periudhë gati 30 vjeçare ka drejtuar në mënyrë të pavarur kurse të plota praktikash dhe leksionesh me studentët e të trija degëve të Fakultetit të Mjekësisë: Mjekësisë së Përgjithshme, Stomatologjisë dhe Famacisë dhe me specializantë pasuniversitarë të të gjithë specialitetve. Ka qenë autor dhe bashkëautor i rinovimit të programeve mësimore të lëndës së Anatomisë Normale, si për studentë ashtu dhe për pasuniversitarë. Kontribues, bashkë me Prof. As. Fiqiri Bashën dhe kolegë të tjerë, në kompletimin e Muzeut të Anatomisë me preparate anatomie.
Pjesëmarrës në të gjithë sesionet shkencore të Katedrës së Anatomi-Histologjisë dhe referues në to. Pjesëmarrës në Konferencën Shkencore të Mjekësisë Shqiptare, me punim nga fusha e Antropologjisë. Pjesëmarrës me punime shkencore në disa veprimtari ndërkombëtare (Jena-Gjermani, Lille-Francë, Novara-Itali). Specializuar për një periudhë dy mujore në Institutin e Anatomisë së Universitetit “La Sapienza”, Itali, lidhur me teknikën e plastifikimit të preparative anatomike. Në vitin 1996 ka bërë kualifikimin pedagogjik pranë Institutit të Anatomisë në Universitetin e Padovës, Itali.
Që nga viti 1982 deri në vitin 1993, ka kryer detyrën e Përgjegjësit të lëndës së Anatomisë Normale në Katedrën Anatomi-Histologji. Në vitin 1993 është caktuar Përgjegjës i Katedrës së Anatomisë Normale të Njeriut, deri në vitin 1995, që në atë kohë funksionoi si katedër më vete dhe nga viti 1995 deri në vitin 1998 ka qenë Përgjegjës i lëndës së Anatomisë Normale të Njeriut, në përbërje të Departamentit të Lëndëve të Formimit Bazë dhe më pas, në përbërje të Departamentit të Morfologjisë, deri në vitin 2007.
Udhëheqës i shumë punime doktoraturash, oponencash, reçensash disertacionesh a artikujsh shkencorë. Drejtues i Rrethit Shkencor të studentëve në Anatomi, për shumë vite. Bashkëautor i tekstit të Antomisë, për studentët e Farmacisë, bashkë me Prof. As. Fiqiri Basha, autori i tekstit Anatomia Normale e Njeriut, 1, bashkëautor i përshtatjes së volumeve 1 dhe 2 të Atlasit të Anatomisë së Sinjelnikov. Autor dhe bashkëutor i shumë artikujve shkencore dhe shkencorë-popullorë, të botuar në revistat brenda dhe jasht vendit. Autor dhe bashkëautor i shumë referateve e kumtesave të mbajtura në sesionet shkencore të Katedrës Anatomi-Histologji, a në konferenca shkencore kombëtare. Njohës i disa gjuhëve të huaja.
Prof. Dr. Sazan Gabrani ishte një nga pedagogët klasikë të lëndës së Anatomisë së Njeriut, që veprimtarinë e tij akademike e shkencore dha një kontribut të padiskutueshëm në këtë lëndë dhe në tërë katedrën (departmentin). Ai përfaqësoi me siguri njohësin më të mirë të brezit të tij të anatomëve shqiptarë, që njohu mirë jo vetëm anatominë deskriptive në aspektin teorik, por dhe atë të konretizuar në praktikën anatomike. Kurdoherë u prezantua me kompetencë akademiko-didaktike dhe kapacitet drejtues të lëndës; nga kërkesa të larta profesionale, akademike, shkencore dhe administrative, për vete dhe kolegët e tij.
Homazhet bëhen te funeral “Alba” pranë Medresesë, percjellja per ne banesen e fundit, Tufine, dt.24, ora 12:00.
Fakulteti i Mjekësisë shpreh ngushëllimet më të sinqerta familjarëve, kolegëve dhe studentëve të Prof. Sazanit! U prehtë në paqe”
