Ka ngjallur reagime të forta prania e aktivistes republikane amerikane Evi Kokalari krah Berishës, në takimin e këtij të fundit me bazën e demokratëve në Vlorë, e cila, përvec futjes pa pritur e papandehur në betejen që po zhvillohet për kreun e PD-së mes Berishës dhe Bashës, ka lëshuar edhe deklarata të forta ndaj këtij të fundit, duke thënë se atij i kishte mbetur vetëm logoja dhe vula, e se ka ardhur koha që ai tani të jetë tashmë vetëm një ish-kryetar i PD-së.
Në fjalën e saj krah Berishës, Kokalari theksoi se kishte ardhur nga Amerika pikërisht për të nxjerrë PD-në nga kriza ku gjendej, e se detyra e Berishës, veç kthimit të PD-së në 91-in, qe edhe futja e pikëpamjeve të Partisë Republikane amerikane në Partinë Demokratike të Shqipërisë. Ajo i ftoi demokratët e pranishëm të firmosnin për të mbledhur Kuvendin e PD-së, në mënyrë qe t’i hapnin udhë reformimit të kësaj Partie, e po ashtu edhe një bashkëpunimi të fortë me Partinë Republikane Amerikane.
Shumë faleminderit zoti Berisha, tha Kokalari në fjalën e saj. Unë kam ardhur në Shqipëri vetëm për juve. Në 23 vitet e fundit, unë kam qenë në Shqipëri vetëm 20 ditë fatkeqësisht, dhe kam ardhur vetëm t’ju flas juve direkt, sepse Partia Demokratike është në krizë totale. Mua më vjen keq që Shqipëria është po në atë pikë dhe Partia Demokratike është në atë pikë, që është marrë peng nga socialistët dhe ne nuk kemi absolutisht opozitë në Shqipëri. Dëgjova dikë më parë që iu drejtua Lulëzim Bashës me fjalën ish. Unë jam shumë dakord që Lulëzim Basha duhet të jetë ish kryetar i PD-së.
Problemi nuk është tek papaftësia e Lulëzim Bashës, tha më tej Kokalari, problem është që Lulëzim Basha nuk ka mundur të ketë bazën me vete. Mund të jetë i shitur, por kam idene nëse Lul Basha shkon në ndonjë prej qyteteve shqiptare për të mbledhur bazën, nuk do paraqiteshin më shumë se 5 veta. Dhe mua më vjen vërtet çudi, që zoti Berisha kudo që shkon, ka një bazë shumë të fortë dhe kjo është e vetmja gjë që do e shpëtojë Partinë Demokratike.
Zoti Berisha ka një detyrë momentalisht, theksoi Kokalari. Jo vetëm ta kthejë PD-në ku ka qenë në 1991-n, por duhet ta rindërojë edhe me parimet e Partisë Republikane Amerikane. Dhe kjo është arsyeja pse unë jam këtu. Po përfitoj nga rasti që të fus pikëpamjet e Partisë Republikane Amerikane, në Partinë Demokratike të Shqipërisë. Berisha duhet jo vetëm të riformojë PD-në, por edhe mënyrën si funskionon Partia Demokratike. Me sa kam kuptuar, Lulëzim Bashës i ka mbetur vetëm llogo e Partisë Demokrtike dhe vula. Të tërë të tjerët, baza, është këtu me ne.
E vetmja gjë që duhet bërë tani, dhe që zoti Berisha duhet t’ua thotë, është që secili nga ju që ka të drejtën e votës, kudo që jeni, në degët tuaja, në qytetet tuaja, të shkoni dhe të firmosni formularët që të thirret Kuvendi. Duhen 1400 firma, kam idenë që ne do të mbledhim më shumë se 1400 firma, dhe sa më shpejt aq më mirë.
Unë ju premtoj vetëm një gjë, e mbylli fjalën e saj Kokalari. Ndihmën e shqiptarëve të Amerikës do e keni. Ndihmën e individëve si puna ime, që jemi në Partinë Republikane Amerikane do e keni, dhe sapo të kemi kryetarin e ri të PD-së, do fillojë një punë shumë intensive për të punuar shumë afër me Partinë Republikane Amerikane.
