“Strategjia e BE-së për gatishmëri” sugjeron krijimin e një qendre krizash të BE-së, për t’iu përgjigjur kërcënimeve në zhvillim, tensioneve gjeopolitike, ndryshimeve klimatike”.
Komisioni i BE-së dhe Përfaqësuesja e Lartë Kaja Kallas kanë nisur një ‘Strategji të BE-së për gatishmëri’, për të mbështetur Shtetet Anëtare dhe për të përmirësuar kapacitetin e Evropës për të parandaluar dhe për t’iu përgjigjur kërcënimeve në zhvillim, duke përfshirë tensionet dhe konfliktet gjeopolitike, kërcënimet hibride dhe sigurinë kibernetike, manipulimin dhe ndërhyrjen e informacionit të huaj, ndryshimet klimatike dhe fatkeqësitë natyrore. Strategjia inkurajon popullsinë të grumbullojë “furnizime thelbësore për një minimum prej 72 orësh në rast emergjence” dhe sugjeron krijimin e një qendre krize të BE-së për “përmirësimin e integrimit midis strukturave aktuale të krizës në BE”.
“Mendoj se të jesh i vetëdijshëm për rreziqet dhe të përgatitesh për t’u përballur me to, është pikërisht e kundërta e krijimit të panikut. Përkundrazi, do të thotë të shmangësh lëvizjet e panikut dhe reagimet irracionale, si ato që pamë gjatë pandemisë. Të jesh i përgatitur dhe duke u bërë gati për të përballuar çdo situatë të re, do të thotë të njohësh gjestet që shpëtojnë jetë, të dish kë të telefonosh, cili është zinxhiri i udhëheqjes dhe çfarë mund të bëjmë në një nivel individual”, deklaroi Komisioneri Evropian për Menaxhimin e Krizave, Hadja Lahbib, në konferencën për media ku prezantoi strategjinë për përgatitjen e Unionit.
Strategjia bazohet në raportin e ish-presidentit finlandez Sauli Niinistö dhe përfshin 30 veprime kyçe dhe një plan veprimi të detajuar, për të çuar përpara objektivat e gatishmërisë së BE-së, si dhe zhvillimin e një ‘kulture gatishmërie sipas projektimit’, në të gjitha politikat e BE-së, deklaroi Komisioni pwrmes një deklarate.
-Së pari, bëhet fjalë për mbrojtjen e funksioneve thelbësore sociale të Evropës, duke zhvilluar kritere minimale të gatishmërisë për shërbime si spitalet, shkollat, transporti dhe telekomunikacioni; si dhe përmirësimi i furnizimeve me pajisje dhe materiale kritike nga njëra anë, dhe përshtatja klimatike e disponueshmëria e burimeve natyrore kritike si uji nga ana tjetër.
-Brukseli më pas synon të promovojë gatishmërinë e popullatës, për shembull duke i inkurajuar ata të marrin masa praktike, të tilla si mbajtja e furnizimeve thelbësore për një minimum prej 72 orësh në rast emergjence.
Strategjia përfshin krijimin e një qendre evropiane të krizës, për të përmirësuar integrimin midis strukturave ekzistuese të krizës të BE-së dhe për të koordinuar më mirë reagimin ndaj krizave. Ndër objektivat kryesore të planit është forcimi i bashkëpunimit civilo-ushtarak, me ushtrime periodike përgatitore në të gjithë BE-në, duke përfshirë forcat e armatosura, mbrojtjen civile, policinë, sigurinë, punonjësit e shëndetësisë dhe zjarrfikësit. Pritet edhe lehtësimi i investimeve me përdorim të dyfishtë.
-Brukseli synon gjithashtu të zhvillojë një vlerësim gjithëpërfshirës të rrezikut dhe kërcënimit në nivel evropian, me qëllim parandalimin e krizave të tilla si fatkeqësitë natyrore apo kërcënimet hibride.
-Plani sugjeron më pas krijimin e një task force të gatishmërisë publike-private dhe zhvillimin e protokolleve të emergjencës me bizneset për të siguruar disponueshmërinë e shpejtë të materialeve, mallrave dhe shërbimeve thelbësore dhe linja të sigurta të prodhimit.
-Një kapitull i strategjisë i kushtohet më pas bashkëpunimit me partnerë strategjikë si NATO për lëvizshmërinë ushtarake, klimën dhe sigurinë, teknologjitë në zhvillim, kibernetikën, hapësirën dhe industrinë e mbrojtjes.
Në përgjithësi, duke marrë një qasje proaktive ndaj gatishmërisë, BE-ja synon të ndërtojë një kontinent më elastik dhe më të sigurt, të pajisur më mirë për të përballuar sfidat e shekullit të 21-të.
