Gjatë procesit të ankimimit të rezultatit të zgjedhjeve të 25 prillit, koalicioni PD-AN i ka kërkuar Komisionit të Ankimimit dhe Sanksioneve (KAS), që nëse argumentat e tyre u duken të pamjaftueshme për përsëritjen e zgjedhjeve, atëherë KAS, me autoritetin që i jep ligji, të administrojë të tjera prova nga insitucionet përkatëse, me qëllim verifikimin e tyre.
Kas është i detyruar t’u drejtohet insitutucioneve dhe t’i marrë këto prova, ka deklaruar përpara gazetarëve Ivi Kaso, specialisti për zgjedhjet pranë Partisë Demokratike. Sigurisht këto prova, që do provonin masakrën e 25 prillit, nuk i janë vënë dhe as nuk do t’i vihen në shërbim opozitës, dhe rruga e vetme për t’i administruar ato në procesin ankimor, është që vetë KAS t’u dërgojë kërkesë organeve kompetente dhe të marrë gjithë informacionin e kërkuar nga ana jonë. Kjo vendimmarrje dhe kjo sjellje për të mos administruar provat që ne kërkojmë, shkon në drejtim të kundërt të transparencës së procesit zgjedhor, dhe në drejtim të kundërt të pritshmërisë, jo vetëm të opozitës e cila është ankuese në këtë proces, po gjithë shqiptarëve, mbi çdo aspekt ende të errët, të masakrës zgjedhore të 25 prillit.
Në deklaratën e tij, Kaso theksoi se PD-ja u është drejtuar zyrtarisht këtyre institucioneve, por provat që sipas tij demaskojnë sjelljen e paligjshme dhe vënien në shërbim ndaj partisë në pushtet, as nuk i janë vënë e as do t’i vihen në dispozicion opozitës.
PD ka paraqitur një numër të madh provash mbi çdo aspekt të administrimit dhe përgatitjes së procesit zgjedhor që ajo ka mundur të sigurojë, por PD nuk është institucion ligjzbatues, tha Kaso, nuk ka kompetencat që kanë institucionet shtetërore dhe në këtë mënyrë ajo pret që, në respektim të garancive që Kodi Zgjedhor ka mbi kërkesat e subjekteve, të bëhet dritë dhe të administrohen të gjitha ato prova që nuk janë në disponibilitetin tonë. Ne çfarë kemi pasur, i kemi depozituar, por tashmë detyrimi është, siç e thashë, në bazë të nenit 137 të Kodit Zgjedhor, që Komisioni Qendror i Zgjedhjeve, në kuadër të një procesi ankimor, të administrojë gjithçka tjetër që palët garuese në procesin zgjedhor dhe ankimuese, nuk kanë pasur mundësi që t’i sigurojnë dot vetë. Ajo që ne pretendojmë, është që dimensioni i plotë i gjithçkaje ka ndodhur, do të zbulohet dhe do të vijë në vëmendjen e publikut dhe në tryezën e KQZ-së, vetëm pasi të administrohet i gjithë dokumentacioni që ekziston nëpër agjencitë e ndryshme shtetërore, institucionet e ndryshme shtetërore, të cilën ata refuzojnë ta ndajnë jo vetëm me PD, por edhe me mediat edhe me aktorë të tretë që i kanë kërkuar këto dokjumentacione. Ky dokumentacion mund të sigurohet vetëm në rrugë zyrtare, nga institucioni që shqyrton ankimet zgjedhore, dhe për këtë kërkesa jonë është e qartë dhe konseguente: është KAS-i që duhet të veprojë në bazë të një detyrimi ligjor, që e ka qartësisht të shprehur në Kodin Zgjedhor.
Por cilat janë provat që PD i kërkon Komisionit të Ankimimit dhe Sanksioneve, t’i marrë nga institucionet e tjera shtetërore?
Janë të total 19 kërkesa, të cilat, sipas koalicionit PD-AN, nëse zbardhen, vërtetojnë krimin zgjedhor kryer nga partia në pushtet, për zgjedhjet e 25 prillit.
- Marrjen e një informacioni zyrtar nga Prokuroria Kundër Korrupsionit dhe Krimit të Organizuar për numrin e procedimeve penale lidhur me krimet zgjedhore dhe fazën e tyre;
- Marrjen e një informacioni zyrtar nga Prokuroria e Përgjithshme për numrin e procedimeve penale lidhur me krimet zgjedhore në prokuroritë e rretheve dhe fazën e tyre;
- Marrjen e një informacioni zyrtar nga Drejtoria e Përgjithshme e Policisë së Shtetit për numrin e shtetasve të ndaluar, të arrestuar dhe numrin e rasteve të referuara për krime zgjedhore;
- Marrjen e një informacioni zyrtar nga Drejtoria e Përgjithshme e Rezervave Materiale të Shtetit mbi gjendjen e rezervave të shtetit në depozitat qëndrore dhe lokale për cdo muaj nga Dhjetor – Maj 2021;
- Marrjen e një informacioni zyrtar nga Inspektoriati Qëndror dhe të gjitha inspektoriatet që veprojnë në Shqipëri për numrin e inspektimeve të kryera në periudhën 24 Dhjetor 2020 – 1 Maj 2021; për numrin e gjobave dhe sanksioneve të vendosura; numrin e sanksioneve/gjobave të revokuara me vendim administrativ/vendim gjyqësor;
- Marrjen e një informacioni zyrtar nga Agjencia e Prokurimeve Publike për numrin e tenderave, koncesioneve, PPP-ve të shpallur rishtazi apo për të cilat janë shpallur fituesit në periudhën 24 Dhjetor 2020 – 1 Maj 2021;
- Marrjen e një informacioni zyrtar nga Këshilli Kombëtar i Teritorit për numrin e lejeve të ndërtimit të dhëna në periudhën 24 Dhjetor 2020 – 1 Maj 2021;
- Marrjen e një informacioni zyrtar nga Agjencia Shtetëror e Kadastrës për numrin e lejeve të legalizimit të dhëna sipas qarqeve në periudhën 24 Dhjetor 2020 – 1 Maj 2021;
- Marrjen e një informacioni zyrtar nga Drejtoria e Përgjithshme e Gjendjes Civile mbi numrin e shtetasve shqiptarë që ndryshuan adresat e banimit në periudhën 1 Janar 2020 – 1 Maj 2021;
- Marrjen e një informacioni zyrtar nga Departamenti i Administratës Publike për numrin e punonjësve të institucione publike, vendore apo qëndrore, dhe si ka ndryshuar, sipas qarqeve, për periudhën 1 Janar 2020 – 1 Maj 2021;
- Marrjen e një informacioni zyrtar nga 61 bashkitë e vendit, agjencitë e varësisë dhe shoqëritë në pronësi të shtetit apo bashkive, për numrin e punonjësve të institucioneve publike, vendore apo qëndrore, dhe si ka ndryshuar, për periudhën 1 Janar 2020 – 1 Maj 2021;
- Marrjen e një informacioni zyrtar nga Ministria e Shëndetësisë dhe Mbrojtjes Sociale dhe 61 bashkitë e vendit lidhur me numrin e familjeve që kanë përfituar ndihmë ekonomike dhe ndryshimin e masës ekonomike, në periudhën 1 Janar 2020 – 1 Maj 2021;
- Marrjen e një informacioni zyrtar nga Prokuroria e Posacme kundër Korrupsionit dhe Krimit të Organizuar lidhur me fazën e hetimeve lidhur me bërjen publike të të dhënave të 910 mijë qytetarëve të Tiranës;
- Marrjen e një informacioni zyrtar nga INSTAT mbi numrin e shqiptarëve që jetojnë jashtë Shqipërisë; numrin e shqiptarëve që jetojnë në Greqi dhe Maqedoninë e Veriut; dhe numrin e këtyre shtetasve mbi moshën 18-vjec;
- Marrjen e një informacioni zyrtar nga Ministria e Shëndetësisë mbi numrin e personave të infektuar me COVID-19 në datën 25.04.2021 sipas qarqeve;
- Marrjen e një informacioni zyrtar nga Drejtoria e Përgjithshme e Policisë së Shtetit mbi numrin e shtetasve shqiptarë që kanë hyrë në Shqipëri në periudhën 19.04.2021 – 25.04.2021 nga Republika e Greqisë dhe Maqedonia e Veriut; listën e plotë të këtyre personave;
- Marrjen e një informacioni zyrtar nga OSHEE mbi të gjitha shpërblimet që u janë punonjësve të kësaj kompanie shtetërore, sipas qarqeve, në periudhën 1 Janar 2020 – 1 Maj 2021;
- Marrjen e një informacioni zyrtar nga KESH mbi numurin e personave të punësuar në periudhën 1 Janar 2020 – 1 Maj 2021;
- Marrjen e të dhënave të kryqëzuara ndërmjet pajisjeve të identifikimit elektronik PEI për zonën zgjedhore Qarku i Gjirokastrës.
