Pas shkarkimit të Bashës nga Kuvendi i Berishës, e pas deklaratës së tij për mbledhje të jashtëzakonshme të Këshillit Kombëtar të PD-së sot në orën 15.00, sapo ka reaguar edhe Fatbardh Kadilli, një prej emrave që kandidoi në fakt kundër Bashës për kryetar të PD-së.
Kadilli i fton dy krerët e PD-së të mos e mbajnë më peng këtë Parti, por të lejojnë garën e vërtetë brenda saj, e vetmja që e shpëton PD-në nga bataku ku po gjallon.
Ka vetëm një zgjidhje që ndalon luftën për pushtet që po zhvillohet dhe mban PD-në e bashkuar, shkruan Kadilli në një status të vetin në fejsbuk. VOTA E ANËTARËVE. Përplasjet dhe alternativat e ndryshme duhet t’i zgjidhin anëtarët. Basha nuk e ka betejën vetëm me Berishën e as Berisha vetëm me Bashën. Të dy e kanë edhe me ne: ata që duan një drejtim të ri dhe vizion të ri të PD-së. Basha duhet të hapë rrugën menjëherë për mbajtjen e zgjedhjeve të lira dhe të ndershme. Basha nuk mund ta mbajë pushtetin me zor. Shiheni këtë foto: me ndonjë përjashtim, asnjë nga pozuesit nuk ka kontribut në PD, nuk ka ndikim në publik, nuk ka vota. A mund të përjashtojnë këta kryetarët e degëve të zgjedhur mga anëtarësia? A mund të vendosin këta që në PD nuk duhet të ketë garë?Dua t’u bëj thirrje pozuesve në këtë foto dhe në atë që do bëhet në Këshillin Kombëtar: Ndalni shkatërrimin e PD-së me përjashtime dhe mbyllje! Ndalni marrëzinë e mbajtjes së karrikes kundër vullnetit të shumicës së anëtarëve. Lejoni garën, lejoni anëtarët të vendosin. Kjo e shpëton PD-në. Kjo është demokracia. Kjo është qasja amerikane.
