Një shtojcë e re ka hyrë në fuqi në Itali sa u takon spiunimeve në staf, ose siç njihen ndryshe whistleblowing, një sjellje që është bërë e detyrueshme me një ligj të BE-së, e cila tanimë i detyron edhe punëdhënësit e kompanive private, atyre që kanë të paktën mbi 50 punonjës, të krijojnë mënyra për të mbrojtur ata që denoncojnë në punë shkeljet e rregullave të kompanisë.
Sipas këtij dekreti, afati i fundit i të cilit është 17 dhjetori i 2023-it, punëdhënësit e kompanive të mëdha duhet të krijojnë mënyrat e duhura për t’i mbrojtur ata që denoncojnë shkeljet në vendin e punës, duke u siguruar mbi të gjitha anonimatin.
Në dekretin e sapo dalë, nuk kanë mbetur pa u përfshirë edhe sjelljet hakmarrëse që mund të krijohen në ambietet e punës, duke specifikuar ato që përfshijnë largimin nga puna, pezullimin, mosngritjen apo uljen në detyrë, ndryshimin e vendit të punës, ndryshimet në orarin e punës, izolimin, ngacmimin dhe trajtimin e pafavorshëm. Po sipas dekretit, në këto situata është shumë e rëndësishme që t’i kushtohet vëmendje interesave personale të punonjësve, ose dinamikës individuale të marrëdhënies së tyre të punës.
Në rastet kur identiteti i denoncuesit duhet të bëhet i ditur me se s’bën, atëherë, theksohet në dekret, duhet të merret me se s’bën miratimi i tij ose i saj.
