Gjatë gjithë ditës së djeshme, i tërë opinion publik shqiptar, ndoqi me vëmendje të madhe, debatin e aq shumë përforlur mbi ndërtimin e incenaratorëve, i cili na kishte vjedhur të gjithëve 430 milionë euro. Përmes batutave të tij (të gjithëditura tashmë, e padyshim gajasëse), ironisë, kunjave për liderat e PD-së dhe dy grupimet demokrate aktualisht në garë për gjashtë bashki, Rama, “ballëlartë” e pa ia bërë syri tërr, ia rrëzoi në të qindën e sekondës pretendimet Komisionit Hetimor (kryetares dhe anëtarëve të tij), se qeveria përmes skemës së inceneratorëve, u ka vjedhur shqiptarëve 430 milionë euro. “Seriozisht e keni?” pyeti Rama me mimikën e të habiturit. “Nuk mund ta keni seriozisht! Po u shisni shqiptarëve si të vjedhura, para që janë parashikuar të përdoren për mbetjet deri më 2047-n?”.
Dhe fakti ky është. Ato para janë parashikuar të harxhohen për menaxhimin e mbeteve dhe pastrimin e qytetit deri në 2047-n dhe mënyra se si i menaxhoi Komisioni faktet, shpuri ujë vetëm në burimin e Ramës. Opinioni publik, i stërvitur me fanllëkun e garave elektorale e big-bradhore, nuk ngurroi ndërkaq të shënjestronte kahet e kundërta politike, duke treguar herë vjedhjen e madhe të PS-së që pasuroi këtë e atë përmes saj, e herë paaftësinë e kryetares së Komisionit (rrjedhimisht PD-së së Lulëzim Bashës), për të menaxhuar një seancë dëgjimore me Ramën, i cili, përsa e njeh shumë mirë ligjin, karrierën politike të gjithësecilit, me epërsinë e eksperiencës politike mbi shpinë, duke ua ditur shumë mirë bizneset e benefitet, ishte në atë Komision dje si veshka në mes të dhjamit, në një banket të thatë në ushqime e pije, por të pasur me mesazhe politike, kunja e batuta.
Shqiptarët “u qartësuan” pra, Rama vuri të drejtën e tij në vend se as ka vjedhur e as nuk ia kanë vjedhur 430 milionë euro, e se grupet e strukturuara mafioze nuk kanë futur duart në projektin krenarsjellës të qeverisë së tij, duke nxjerrë me gjasa të humbur vetëm Jorida Tabakun, e cila pasi SPAK-u të përfundojë hetimet mbi impiantet e mbetjeve në fjalë, do përfundojë në gjykatë për shpifje, paditur nga Rama.
Po ne? Neve që do na duhet t’i paguajmë 430 milionë euro deri në 2040-n, pra kur unë të jem afër të shtatëdhjetave, ne sa do paguajmë? A mos është ky 430 milionësh, një borxh në fakt, këstet e të cilit do të na rriten e të na ndryshojnë në vijimiësi, për të mbajtur në këmbë e bërë funksionale impiantet e mbetjeve që prodhojnë energji? Se shihni si e shoh unë. Po sikur Bashkia të vijojë të na rrisë e të na rrisë taksat e pastrimit (që i duhen për të paguar koncesionarin) në emër të mirëmbajtjes? Ç’ndodh nëse, pyes unë, nëse koncesionari kërkon e kërkon në vijim, shumë sa më të mëdha për mbajtjen në këmbë të impianteve të djegies së mbetjeve, duke kontribuuar kështu në rritjen e vazhdueshme të taksave të pastrimit, që rrjedhimisht do rëndojnë mbi bizneset (që të këputura janë edhe me taksat aktuale) dhe familjarët? A ka në kontratat mes bashkive respektive dhe koncesionarëve të impianteve, tavane të shumave të parashikuar për funskionimin e këtyre impianteve, që do të na sigurojnë ne, popullit, taksa të palëvizshme pastrimi (mundësisht të na ulen), duke mos na i marrë dhe ato dy kacidhe që na gjenden në xhep (se pastaj nuk do prodhojmë dot plehëra, se nuk do kemi konsum)? Ç’ndodh mandej pas 2040-s? Në 2050, fjala bie, kur ne do të jemi tek të tetëdhjetat, e me pensionet që (Zot na ruaj) do na bien për pjesë, mund t’i kemi sa taksa e pastrimit?
Ja pra këto janë disa nga pyetjet që Komisioni Hetimor mbi Inceneratorët do të duhej t’i kishte bërë dje Ramës, dhe jo “a do t’i kishit bërë impiantet e mbetjeve, po të ktheheshit pas në kohë”. Impiantet duhen, por duhet parë edhe me një super rigorozitet, se sa do t’u merret qytetarëve nga xhepat në vijimësi, pra mbi 430 milionshin e parashikuar. Se shumica mes shqiptarëve që lidhin kontrata, e kanë bërë zakon tashmë: nënshkruajnë një kontratë me një shumë fillestare, e pastaj, pasi ke hedhur firmën, nisin e të thonë, po shiko, se duhet edhe kjo, po kushton kaq. E unë uroj me shpirt, që ky të mos jetë rasti.
*gazetare, drejtuese e MetropolPost.al
©MetropolPost.al
