Policia e shtetit bën me dije se ditën e djeshme në Himarë, janë vënë në pranga dy inspektorë, si dhe shpallur në kërkim dy të tjerë, për shkak të shpërdorimit të detyrës dhe lejimit të ndërtimit të paligjshëm të objekteve në Himarë.
Sipas njoftimit zyrtar shpërndarë prej Policisë së Shtetit, “Seksioni për Hetimin e Krimit Ekonomik e Financiar në Drejtorinë Vendore të Policisë Vlorë, nën drejtimin e Prokurorisë së Rrethit Gjyqësor Vlorë, pas një pune intensive hetimore disajavore, në bazë të vendimeve të Gjykatës së Rrethit Gjyqësor Vlorë, e cila ka caktuar masën e sigurisë “Arrest në burg”, bëri ndalimin e shtetasve: R. H., 35 vjeç, banues në Himarë, me detyrë kryeinspektor pranë Inspektoratit të Mbrojtjes së Territorit të Bashkisë Himarë; E. Z., 30 vjeç, banues në Himarë, me detyrë inspektor pranë Inspektoratit të Mbrojtjes së Territorit të Bashkisë Himarë. Si dhe u bë shpallja në kërkim e shtetasve: M. N., 36 vjeç banues në Sarandë dhe Dh. B., 53 vjeç, banues në Himarë, të dy me detyrë inspektor pranë Inspektoratit të Mbrojtjes së Territorit të Bashkisë Himarë”
