Javët e fundit Franca është përfshirë nga një sërë protestash ndaj masave të qeverisë, e cila ka bërë të detyrueshme pasaportën shëndetësore për të hyrë në stadiume, trena e vagona, e po ashtu edhe ndaj vaksinimit të detyrueshëm të disa profesioneve.
Vetëm e shtuna, sipas deklaratave të ministrit të Brendshëm francez, numëroi kësaj here rreth 200 mijë persona shesheve të vendit, duke përfshirë incidente me policinë e po ashtu edhe të arrestuar nga aktivistët.
Sipas mediave franceze, protesta të ngjashme janë zhvilluar në më shumë 150 qytete të Francës, si Tulon, Monpelje, Bordo, Marsejë dhe Nicë, dhe më shumë se 140 mijë veta kanë zbritur në Paris, ku kanë mbetur të plagosur tri policë dhe janë arrestuar 19 aktivistë.
Në pankartat e tyre, manifestuesit e akuzojnë mes të tjerave qeverinë për një sulm ndaj lirisë.
Ndërkaq, lideri i partisë së ekstremit të djathtë Rassemblement National, Marine Le Pen, e ftoi qeverinë që t’i merrte seriozisht protestat, sepse qe ende në kohë për tu tërhequr.
Të njëjtën gjë bëri edhe Jean-Luc Mélenchon, i cili u shpreh se protestat duhej të respektoheshin e të dëgjoheshin.
