Pas thuajse 6 muajve përplasjeje të armatosur mes Ukrainës dhe Rusisë, duket se presidenti Zelenskij po sfidon fortë atë rus, Vladimir Putin.
Teksa në Rusi zhvillohej varrimi i Darya Dugina-s, vajzës së filozofit rus Alexander Dugin, në kryeqytetin ukrainas zhvillohej samiti i dytë i Platformës për Krimenë, iniciativë kjo e ndërmarrë vitin e shkuar nga Zelenskij, për të sensibilizuar komunitetin ndërkombëtar, që të mos e braktisë gadishullin nën mëshirën e pushtimit rus. E teksa një vit më parë kjo gjë dukej si mision i pamundur, në këtë takim kësaj radhe raportojnë mediat e huaja, edhe pse virtualisht, ishin mbi 40 lidera e krerë shtetesh, mes së cilëve edhe Emmanuel Macron, Olaf Scholz, Justin Trudeau, Mario Draghi, ndërkohë që presidenti polak Andrei Duda, shkoi personalisht atje, duke sfiduar kështu frikën e vetë qeverisë ukrainase për sulme nga ana e Rusisë, në rast grumbullimesh masive në Kiev.
“Krimea është ukrainase dhe duhet të bëhet sërish pjesë e Ukrainës, siç është Roterdami pjesë e Hollandës, apo Nisa pjesë e Francës”, tha Duda. “Pas krimeve në Bucha dhe shkatërrimit të vendit, Moska jo vetem duhet t’u kthehet kufijëve të para 24 shkurtit, por duhet t’i njohë edhe të drejtën Ukrainës, t’u kthehet kufijëve të njohur ndërkombëtarisht”, u shpreh ai mes të tjerave, duke siguruar që Polonia do të qendrojë përherë në krahë të Ukrainës.
Ndërkaq, Scholz e Macron, pohuan se edhe Gjermania e Franca nuk e njohin aneksimin e Krimesë, por në fjalën e tyre u treguan tejet të vagullt për të ardhmen e saj. Sekretari Amerikan i Shtetit Anthony Blinken deklaroi se “Krimea është Ukrainë”, kurse lideri turk Erdogan, theksoi se “kthimi i Krimesë Ukrainës, pjesë e pandashme e së cilës ajo është, është thelbësisht një detyrim që buron prej të drejtës ndërkombëtare. Kryeministri italian Draghi deklaroi se lufta për Krimenë bën pjesë në luftën për clirimin e Ukrainës, kurse Ursula von der Layen e Unionit Evropian, deklaroi se UE-ja nuk ka për ta njohur kurrë aneksimin ilagal të Krimesë nga ana e Rusisë.
Ndërkaq përplasja me armë mes Ukrainës dhe Rusisë vazhdon. Sipas njoftimeve, të medias vendase, rreth 377 fëmijë janë vrarë që prej nisjes së kësaj përplasjeje të armatosur.
