Kanë pushtuar mbarë rrjetet socilale pamjet nga katastrofa ambientale dhe njerëzore në qytetin e Fierit, ku një re e madhe tymi, shkaktuar nga djegia e plehrave në landfillin e Mbrostarit (në hyrje të Fierit, kur vjen nga Tirana) thuajse ka pushtuar gjithë qytetin.
Duhet saktësuar në fakt, që autoritetet e qytetit të Fierit, sqarojnë se kjo situatë ka ardhur si pasojë e rënies së zjarrit në këtë landfill për hir të temperaturave të larta, dhe se ato nuk po digjen me dashje nga Bashkia. Ndërkaq, vetë qytetarët pohojnë për MetropolPost.al, se Bashkia ka nisur të hedhë ujë me autobote nëpër qytet, me gjasa për të shpërndarë disi tymin.
Vetë kreu i Bashkisë së Fierit Armando Subashi, ka deklaruar ndërkaq se “30 gushti do të jetë me gjasa afati maksimal i zgjidhjes përfundimtare të kësaj situate“, e cila do të shpinte sipas tij, në mbylljen e fushës 74 vjeçare të depozitimit të mbetjeve në qytetin e Fierit, për të nisur më pas punën në inceneratorin aq shumë diskutuar të këtij qyteti.
Sa i takon mosvënies në punë të inceneratorit, kreu i Bashkisë së Fierit Armando Subashi, ua vuri fajin rrugëve që të shpien për tek inceneratori, të cilat sipas tij nuk kanë përfunduar ende, duke u bërëbërë pengese për shpënien e plehrave atje. “Ajo çfarë ka ngelur dhe ka mbetur ditët e fundit, është rehabilitimi i rrugëve që na çojnë tek inceneratori, shprehet Subashi në një intervistë për mediat vizive në vend. Nuk kanë qenë rrugët e bëra. Po bëjmë një stacion për transferimin e mbetjeve, dhe distanca nga Fieri tek inceneratori është e konsiderueshme. Nuk shkojnë dot mjetet gjithë natën dhe të bëjnë shumë rrugë. Do ishte humbje kohe dhe shpenzime pa fund. 30 gushti do të jetë ndoshta afati maksimal, që mund ta mbyllim këtë fushë 74-vjeçare të depozitimit të mbetjeve në Fier, dhe të fillojmë me inceneratorin“
