Quhet “Tomorrow Biostasis” dhe është kompania e parë europiane që nis një program letargjie. E themeluar në vitin 2019, nga mjeku gjerman Emil Kendziorra, qëllimi i saj është të ngrijë në mënyrë kriogjenike trupat e njerëzve të vdekur rishtazi, me shpresën se një ditë mjekësia do të jetë në gjendje t’i kthejë ata në jetë. Kompania ndodhet në Berlin, por tashmë mban katër trupa në qeliza të mbushura me azot të lëngshëm në -196 gradë, në një qendër zvicerane me 4000 banorë (Rafz, në Kantonin e Cyrihut). Ëndrra e themeluesit të kompanisë është “të ndërtojë një botë ku njerëzit mund të zgjedhin se sa do të jetojnë, pavarësisht se ku janë, kush janë dhe burimet e tyre financiare”.
Si punon
Trupi duhet të jetë i vdekur, por nuk duhet të ketë kaluar më shumë se një orë, për të shmangur vdekjen qelizore të organizmit. Për të ngadalësuar këtë proces, ekipi i operatorëve të “Tomorroë Biostasis” e transporton trupin me një ambulancë të posaçme ku kryet shtypja e krahërorit dhe e mbush me oksigjen përmes një maske të frymëmarrjes. Ai e zhyt kufomën përkohësisht në akull dhe e transporton në qendrën Rafz. Më pas, gjaku largohet nga trupi dhe në vend të tij injektohet një përzierje antifrizi dhe kimikatesh, që shërbejnë për ruajtjen e organeve. Ky proces quhet vetrifikim. Vetëm në këtë pikë i ndjeri zhytet në azot të lëngshëm, në pothuajse 200 gradë nën zero, në një qeli çeliku 3 metra të lartë. Të gjitha pa përdorimin e energjisë elektrike.
Sa kushton
Ekzistojnë dy lloje shërbimesh: krioruajtje e gjithë trupit dhe krioruajtje vetëm për trurin. Në rastin e parë, mbulimi nga sigurimi është 200 mijë euro. Në të dytin, arrin në 60 mijë. Rreth 400 persona tashmë janë regjistruar në programin e letargjisë, duke paguar një tarifë mujore prej 25 euro (që nga 15 qershori, bëhet 50 euro). Klientët e kompanisë janë kryesisht meshkuj të moshës 25 deri në 45 vjeç dhe janë kryesisht konsulentë, shkencëtarë, mjekë, shkencëtarë kompjuterikë dhe inxhinierë.
Kriogjenikët praktikohen tashmë kryesisht në Shtetet e Bashkuara dhe Kinë. Dy furnizuesit kryesorë të këtij shërbimi, janë në fakt amerikanë (Instituti Cryonics, themeluar nga Robert Ettinger, dhe kompania Alcor, por është edhe KrioRus ruse) siç janë shumica e njerëzve në hibernacion. Aktualisht janë 377 persona. Që nga viti 1967, 500 njerëz janë kriokonservuar në të gjithë botën, ndërsa janë rreth 5 mijë në listën e pritjes.
