Duket se një debat shpronësimi dhe ndërtimesh të reja, ka shpënë në gjuhën e flakëve atë që të gjithë e njohin si “Sarajet e Toptanasve”, në pedonalen e Tiranës.
Ngjarja ka tronditur mbarë opinionin publik, i cili, pas shembjes së Teatrit Kombëtar, ka parë në flakët e vëna asgjësimin e një tjetër elementi nga kujtesa kolektive e qytetit.
Por nuk ka qenë aspak kështu. Kreu i Bashkisë së Tiranës Veliaj, përmes një statusi në fejsbukun e tij, ka sqaruar se djegia e objektit është tentuar për hir të shpronësimit të godinës, duke shigjetuar figura politikanësh që sipas tij “ditën merakosen për lodrat dhe natën i vënë zjarrin qytetit”
Nuk dihet ende se për kë politikan e hedh fjalën kreu i Bashkisë Tiranë. Ajo që dihet nga njoftimi i tij në fejsbuk, është se “Sarajet e Toptanit” do të rinkonstruktohen, shpallen shtëpi muze dhe do të happen për publikun e gjerë.
Statusi i plotë i Veliajt
Mbrëmë, në orën 23:49, Policia Bashkiake, pranë AMK – po, ata që sulmonte presidenti – kanë njoftuar sallën operative për zjarrvënie pranë monumentit të kulturës, të njohur gjerësisht si ‘Sarajet’.
Në pak minuta, zjarrfikësit e Bashkisë së Tiranës kanë shuar zjarrin e qëllimtë në 2 vatra .
Në dallim nga shumë objekte, për të cilat bëhet zhurmë pa lidhje, si lodrat te Liqeni apo ngrehina e tallashit te Teatri Kombëtar, objekti ‘Sarajet’ është monument kulture.
Dje, nën stilin e shkollës “Kosova”, u tentua djegia e objektit nga dritarja e pasme, që pronarët të ndalojnë shpronësimin.
Kamerat e sigurisë kanë kapur zjarrvënësin teksa largohet përballë ‘Torre Drin’, ndërkohë Policia e Shtetit po punon për ta çuar në pranga. Por, zjarrvënësit e vërtetë janë porositësit – edhe për këta nuk do ketë mëshirë! Politikanë që ditën merakosen për lodrat, e natën i vënë zjarrin qytetit.
Në mesnatë bisedova me Kryeministrin Edi Rama, i cili ka autorizuar shpronësimin e përshpejtuar për ‘Sarajet’, si një nga aktet e para të qeverisë së re. Ta harrojnë që aty do ketë ndërtim, e ta harrojnë që aty do ketë zjarr gjersa të bëhet shpronësimi. Nga sot ka nisur regjimi 24h roje!
Ngjarjet do rrjedhin si me poshtë:
1. Shpronësim për 18 pronarët (jo të gjithë janë politikanë piromanë).
2. Shpallja “Shtëpi Muze”, si shtëpia e Zekatëve dhe Skëndulatëve në Gjirokastër.
3. Rikonstruksion dhe hapje për publikun.
Mirënjohje zjarrfikësve dhe policisë për mbrëmë!
