Për vite me radhë, Maduro konsiderohej udhëheqësi i Cartel de los Soles. Tani kjo gjë është zhdukur nga aktakuza, sepse grupi i drogës nuk ekziston.
Për pesë vjet, Departamenti i Drejtësisë i SHBA-së ka drejtuar gishtin nga Nicolas Maduro, duke e akuzuar atë si udhëheqësin e Cartel de los Soles, i konsideruar si një nga organizatat më të fuqishme të trafikimit të drogës në Amerikën Latine. Tani, mes heshtjes së plotë të administratës, kjo akuzë është tërhequr në mënyrë sensacionale në dokumentet e hartuara dhe të publikuara nga Prokurorja Pam Bondi. Gjithashtu sepse, siç kanë pohuar prej kohësh ekspertët e krimit të organizuar, ai kartel thjesht nuk ekziston.
Cartel de los Soles dhe aktakuza e re kundër Maduros
Fillimisht në aktakuzën e vitit 2020, pastaj në ripublikimin e saj urdhëruar nga Trump korrikun e kaluar 2025, Nicolas Maduro u identifikua qartë në dokumentet e Departamentit të Drejtësisë si udhëheqësi i padiskutueshëm i një organizate masive të trafikimit të drogës. Një kartel aq i fuqishëm, saqë fitoi përfshirjen e tij në listën e organizatave terroriste të Shtëpisë së Bardhë, e cila përditësohet periodikisht. Ky përshkallëzim i akuzave pritej të theksohej dhe të shfaqej në mënyrë të spikatur në aktakuzën, të publikuar të shtunën, më 3 janar. Por pavarwsisht kwsaj, nuk kishte asnjë gjurmë të saj: Maduro u përshkrua si një figurë kyçe në një “sistem të korruptuar dhe klientelist” të ushqyer nga droga dhe paratë. Dhe, si me magji, nga 32 herë që përmendej Cartel de los Soles në aktakuzat e mëparshme, referencat për kartelin e dyshuar qenë reduktuar në dy.
Çfarë është Cartel de los Soles?
Sipas rindërtimeve të ekspertëve, Cartel de los Soles nuk ekziston. Ose më saktë, nuk është një organizatë e vetme, por një emër i vetëm që përdoret në Venezuelë, për të identifikuar grupe të panumërta të vogla kriminale, të lidhura me ushtrinë dhe të përfshira në aktivitete të ndryshme të paligjshme: nga kontrabanda e benzinës tek minierat e paligjshme e deri tek trafikimi i drogës. Prandaj nuk është një strukturë e organizuar vertikalisht, por një rrjet informal qelizash ushtarake, nga më të ulëtat te më të lartat, të cilat menaxhojnë dhe rregullojnë në mënyrë efektive trafikimin brenda vendit pa ndonjë lidhje të qartë me njëra-tjetrën. Termi Cartel de los Soles, u shpik jo rastësisht për herë të parë në vitin 1993, kur dy gjeneralë të njësisë anti-drogë të ushtrisë u hetuan për trafik droge. Si komandantë brigade, ata mbanin një diell në të dy rripat e shpatullave të uniformave të tyre kamuflazh. Që nga ky moment e tutje, venezuelianët i referohen njësive të korruptuara të ushtrisë me këtë emër.
Akuza e riformuluar
Dhe kështu, duke ndjekur këtë qasje, Departamenti i Drejtësisë ka përshtatur akuzat kundër ish-presidentit të Venezuelës. Nicolas Maduro akuzohet se ka grumbulluar fitime nga dhe ka mbrojtur trafikantë të shumtë droge, të përcaktuar si “zyrtarë të korruptuar civilë, ushtarakë dhe të inteligjencës, që veprojnë në një sistem patronazhimi të menaxhuar prej atyre në krye, në lidhje me emblemën e diellit që varet nga uniformat e zyrtarëve të lartë ushtarakë të Venezuelës”.
