Kreu i Partisë Demokratike Lulëzim Basha, ka filluar të ngrejë siparin e asaj që cilësohet dhe pritet të jetë edhe beteja e demokratëve përgjatë shtatorit, muaj kur nis edhe sezoni i ri politik në vend, me parlamentin e ri e dalë prej zgjedhjeve të aq shumë kundërshtuara të 25 prillit.
Përmes një statusi të vetin në fejsbuk, Basha thekson se platforma qytetare për demokracinë, do të bëjë bashkë të gjitha forcat që janë mëse të vendosura të shpëtojnë vendin nga sundimi i një pakice, dhe se beteja e demokratëve nuk është kundër PS-së, por ndaj pakicës së korruptuar, që ka kapur dhe plaçkit shtetin.
Beteja jonë dhe e shoqërisë shqiptare nuk është kundër Partisë Socialiste, shkruan Basha, por kundër pakicës së korruptuar, që ka kapur shtetin dhe e plaçkit atë me një grusht të vogël njerëzish, me të cilët masakron zgjedhjet, kriminalizon politikën dhe shkatërron ekonominë. Shqiptarët i’a dinë dështimet, raportet ndërkombëtare i’a kanë ekspozuar babëzinë, askush nuk gënjehet nga ripërtypja e fjalimeve të vjetra të atij që ka varfëruar familjet shqiptare dhe ka degdisur gjysmë milioni shqiptarë. Përballë këtij regjimi, kemi detyrën qytetare të bashkohemi dhe të punojmë për kthimin e demokracisë dhe legjitimitetit në vend. Platforma qytetare për demokracinë do të bëjë bashkë të gjitha forcat e gjalla të shoqërisë që e duan ndryshimin dhe janë të vendosura të shpëtojnë vendin nga sundimi i një pakice që mban peng të ardhmen e tij.
